Şerê Reqa bi 92 rojîyo dewam keno. Şerê Reqa hê destpênêkerdibi ser Şerê Reqa de zaf(xeylî) qiseykerdiş benê.
Bi taybet dewleta dagîrker dewleta tirk û AKP û Erdoganî qîre qîre kerdêne. Erdoganî vatenê, ma ewro siba kewnê Reqa. Çapemenîyê AKP xerîta zî amede kerdibî. Goreyê planê înan yê xerîtayê, dewleta tirk Girê Spî ra kewtenê Rojawanê Kurdistan, hîrayîya 40 km eştê vernîyê xo şênê Reqa. Hetta Erdoganî qiseykerdişê xo de biyeqinî vatênê ‘ma û Amerîka pêameyê, ma pîya operasyonê Reqa kenî.’ Hûmare eskerî zî kewti meydanî. Qale 50 û 80 hezar eskerî bêne. Yanî dewleta tirk û Erdoganî pê 50 û 80 hezar eskerî ser Reqa operasyon viraştêne. Yanî xeyalê tirkan ser Reqa zaf girdibî. Çapamenîya tirk zî pif kerdênê ha pif kerdênê.
Hetêk bîn ra zî Erdogan û KDP eynî qisey kerdênê. Her dîyan zî hina qîrênê. ‘Reqa bajarê kurdan nîyo, bajarê erebeno, çi karê kurdan Reqa de esto!” Hina bibi ke, na propaganda zereyê şarê kurdî de tayî ca girewtibi. Tayî şarê kurd yê welatperwerî zî, qisey xo de vatênê, ‘çi karê ma Reqa de esto?’. Yanî tesîra propagandaya xirab ser şarê kurd yê welatperwer de zî virazîya bi. Ayê ke hina qisey kerdênê nêzananê ke şaro ke Reqa de ciwîyenî en tayî sera 20 şarê kurdî yo. Yanî tena zereyê Reqa de en tayî 40 hezar kurdî ciwîyenî. Reyna ayê ke hina qiseykerdenê, înan nêzananê pawitişê Rojawanê Kurdistan, Çemê Firatî ra derbas beno.
Reynayî ra zî înan nêzananê çeteyê DAÎŞ yê girêdayî dewleta tirkî, Reqa de plan viraşt, dima ra hêrîşê Şengal û Kobanê kerd. Wexto ke çeteyên DAÎŞ hêrîşe Şengal û Kobanê kerd, YPG zî soz da şarê kurd û pêronê dinya ra vat ke, “Çeteyê DAÎŞ yê girêdayî dewleta tirk ça de plan viraşt û hêrîşê Şengal û Kobanê kerdo, ma şinî, uca de DAÎŞ kenî bin erdî.” YPG yew bi yew soze xo ca ard. YPG û QSD gam bi gamî verbi Reqa ra şîyê, nika tayî mendo ke pêronê bajarê Reqa bin dagîrkerîya DAÎŞ’î ra rizgar û xelasibibo.
Bi xelasbîyayîşa Reqa ra qesasgirewtişê Şengal û Kobanê yeno girewtiş. Bi xelasbîyayîşa Reqa ra sîsteme konfederal sey modelêk serek beno modele îdarekerdişa Rojhelatê Mîyanîn.
Bi xelasbîyayîşa Reqa ra dorme girewtişe aborî yê Rojawanê Kurdistan yeno wederatiş.
Bi xelasbîyayîşa Reqa ra dengeya Rojhelatê Mîyanîn yenî bedilnayîş.
Bi xelasbîyayîşa Reqa ra binvistişa dewleta tirk û AKP yeno mohr kerdiş.
Bi xelasbîyayîşa Reqa ra tarîxêk newe yeno destpêkerdiş.
No tarîxe newe beno tarîxe şarê kurd.
Bi xelasbîyayîşa Reqa ra beno lerz lerzê dewleta tirk û AKP.
Xelasbîyayîşa Reqa qey şarê kurdî beno, yew roşan.
Ez vana bi nika ra şarê kurd qey xelasbîyayîş û îlan kerdiş azadîya Reqa ra xo amede bikero.
Pîroz bikero û goven da gird bigero, qij û pîl herkes kaybikero.