ZEYNEP DURGUT / JINNEWS / COLEMÊRG
Her ke şono zîndananê Kurdistan û Tirkîya de zext û tedayî zêde benî. Reyna zîndanan de bi hezaran hepsîyê nêweşî estî. Nînan ra yewe zî Seyran Demîre ya û Zîndanê Padaye yê Kayserî de manena.
Seyran Demîre bi îdîaya ‘endamê rêxistine bîyayene’ ra 6 serrî 3 aşmî ceza dîyaye aye û 4 serrî yo ke zîndan de ya. Demîre Zîndanê Wanî ra verê surgunê Zîndanê Mûşî, dima ra surgunê Zîndanê Erzîromî û dima ra Zîndanê Tarsusî û tewr peynî zî surgunê Zîndanê Kayserî bîye. Babete ser o dayîke Ciweyra Demîre qisey kerde.
Dayîke Demîre va ‘kênaya mi 4 serrî yo ke şertê zîndanî reyde têkoşîn dana’ û wina domnaye: “Heta roja ma ya ewroyî surgunê 5 zîndanan bîya. Ganî bêro tedawî kerdene. Zîndan de benî revîr, labelê çîyêk nêkenî û tepîya anî. Kênaya mi bi mamaya bebekan yena miqate kerdene. Wexto ke ma şonî pêvînayîşî, tay wext danî. No îşkence yo. Wa Homa nê zulmî qebul nêkero.”
Demîre dewamê qiseykerdişê xo de wina va: “Kurayê dinya de ameyo dîyayene ke merdimo nêweş zîndanan de yo. Ma no edalet o? Kênaya mi nêşêna werd biwera û rayîr şêra. No zulmêko senîn o? Çi zirarê kênaya mi bi înan esto? Heqê merdiman û rûmetê merdimîye binê lingan de yo.”