Fekê kami abeno vano „ziwanê ma nezlê rîyî verde yo, ziwanê ma mabên ra darîno we, peynîya ziwanê ma ama, unesco yî vato kirmanckî nêzdî de mireno ûsb“…
Her kes naye xo rê keno derd la, dûştê naye de kam se keno mûhîmîye tîya de ya. Heya, ez nêeşkena vaja hal û wextê ziwanê ma ca de yo û her çî goreyê waştena ma yo. Ewro domanî keyeyan de zaf zêde qeseyî nêkenê, xort û kokiman mîyan de tekîlîya ziwanî zaf xurte nîya, dewan de dewijî sey verî ziwanî zaf nêşixulnenê û ciwîyayîşê bajarî de zaf xo rê ca nêvîneno kirmanckî(zazakî-dimilkî). ma her yew her roj des dolimî ney çekuyan kenîme têrêze û ser a mûnaqaşe kenîme. heya, na rastîya ma ya.
La rastîya ma ya bîne zî esta.
Ewro bi sedan kitabî(pûrtikî) ameyê nuştîş çap bîyê. qursê ziwanî hama her bajar de estê û her keye de ewro televîzyonan de bernameyê ke kirmanckî ameyê viraştenê temaşe benê.
Mi nûşteyê xo yê hewteya verî de zî vatbî,“ êdî hûkmê asîmîlasyonî ameyo şikîyayêne“. yanê bi sazî û dezgeyan, bi televîzyon û rojnameyan, kowar û kitaban ziwan êdî xo resneno her kesî û her keyeyî.
Ê ma çira ma her dolime sey roja verî vîndîbîyayena ziwanî ser qal kenîme?...
O wext xeletîye esta,şaşîye esta, kêmasîye esta ney karî de. Bi xoverdayîş,bi zor û zehmet kurdan sazîyê xo kerdê avan. Bi araqê çareyê xo, bi gonya xo, bi nênugan meterîsê xo yê hejayî viraştê.
Kitabê ke ma nuşnayê çira nêwanînê!… Kowarê ma çira nêresenê destê şarî!.. Şar çira nêno kûrsanê ziwanî!.... Bernameyê ma yê televîzyonan çira bala şarî nêancenê!.... Wextê ney persan o êdî.
Êdî bi bermayîş û gerre kerdişî çîyê çareser nêbeno. Ganî ma naye fam bikîme û meselaya ziwanî ser tayede bîn xorî bifikirîme.
Goreyê serranê verî xeylê çîyî ênê kerdenê. La ney çîyî huzbarê şarî de senî ca gênê ganî ma naye bivînîme,bimusîme û goş bidîmê rexneyanê şarî ser.
Xoverdayîşê kurdan ewro dinyaye avan kerda. Seba averşîyayîşê ziwanî,kultûrî rayîr akerde yo û xeylê îmkanî estê. Eke wayîrê sazîyan nêbo yew ziwan mireno. Ewro sazîyê kirmanckî zaf kêmî nîyê. tayede bîn ked tayede bîn xebat hewcê keno...
Kirmanckî ver a merdenê nê, ver a xurt bîyayêne şono.