Her herfe bi awayê teli û dirikan xo dana teber a gamî. Her çekuye bena hesrê gunînî kona rûpele ser!
Çendeyke verî wexta bedeno qic yê Alan Kurdî yê Rojawanij dabi qeraxê bêwijdanîya welatan ro, min waşt herinde daye ey de çend çekuyan bilornî, bedenê ey yê qicî ser de. La heme çekuyî bêwate mendî.
Ayê ke kewtî rûpelî ser de zî hesran ey xeneqnay. Min ke hema bi înad waştêne lorîkêke bi awazê daye Alanê qicî kaxizêke ser de binûsnî û ay kaxizî bikerî keştî û ey rê bişrawî, pêser ro pêser çimê min gunayî çend fotografê bînan ro ke bêperwatî, bêînsafî û nêînsanetîya faşîzmî çiman ver de vistêne ra.
Nê fotografê ke lazim bi kurdê ke hema zî xo dayo kişta dagirkeran rayêke bîne bido fikirnayîşî, ka rihê înan çiqas rote yo, an zî çiqas wayîrê heysîyet û şerefe xo yê. Fotografê kurdêke, nîmviran û gonî de mende ke serê peykerê Ataturkî de amebi çewt kerdişî, çiqas ma bi ma hesna? Û fotografê bînî, ke riyê tûtêke ma gonî de mende, ale tirkan ey ra amîya pêşnayîşî û bermaynê?
Kurdo/a ke ewnîyayîşê ey extîyarê xo yê ke emrê ey nizdê neway ayseno, riyê ey gonî de mende û lingêke ey ra sole vetî ya, xo vîr ra bikerê, kurdî ra ver lazim o merdimahîya xo ra bi fikar bê.
Û hîrê fotografê ke Cizîre ra kewtî çimê ma ver. A Cizîre ra ke serokwezîrê dewletêke (O serokwezîr o ke vano; ‘Kurdî eşkenê bi ziwanê xo zêmaran bivacyê, yanê bi ziwanê xo şîn bikerê’(!)) eşkeno vecîyo verê kamerayan û vaco: “Cizîre de sivîlê nêameyê kiştiş.’ A Cizîre kurdan ra hîrê fotografî amey verê çimê şima zî, ne?
Tûkê canê kam merdimî nêwirzeno we, gama zerrey cemedanke de fotografê tûtêka des-jondes serrî ke hetê dewlete Tirkîya ra (ne hetê Îsraîlî ra) amîya kiştiş vînenê? La fotografê ey bebikê ke daye ey amîya kiştiş û o zî birîndar bermeno? Û ancî yê extîyarêke ma ke kuçeyke de kewto û gunye ey xete ra şîya?
Beno ke ma vacê minetê ma dijminî ra çinyo, namey ey pawa yo dijmin. La kurdo/a ke dimayê enî wehşetî ra zî meylê xo bido îxanetî ser, lazim o hesab înan ra bêro perskerdiş. Fikrê înan çi beno wa bibo, na saete ra tepya heqê înan çinyo ke zirar bidê şarê xo ro û înan rê îxanet bikerê.
Ma zanê, roco ke înan linga xo eşta welatê ma, heta eyro cesaretê qirkedişê ke serê ma de pêk anê, xayînan ra gênê. Heta îxanet xo mîyanê ma de bihebêno ko şarê ma raştê qirkerdişê newînan bêro. Şaro ke îxanet mîyanê înan de çinyo azadî, aştî û bextewarî mîyanê înan de esta.
Bi vatişê Seydayê Cegerxwînî; “Kurdêne bibê yew, eke şima nêbê yew, şima ko şêrê yew bi yew.”
Nesrîn NAVDAR