Weçînayinanê 1'ê Mijdarî rê çend rojê peynî mendî.
Raştî de meşrûtiyena nê weçînayinan çinyo. Çi ke weçîntoxan 7'ê Hezîran'î de tercîxê xo weçîna û îradeyê xo beyan kerd. La dîktatorê dergî verra îradeyê weçîntoxan derbe vist dewre û mudaxaleyê îradeyê şarî kerd.
Veriya 1'ê Mijdar AKP û dîktatorê derg Kurdistan de herbî keno xorîn. AKP îtifaqê xo yê bi DAİŞ rameno û hewl dano her ca açarno gola gonîn. Na îtifaq tewr peynî de 10'ê Cotmeng de Enqera de qetlîamê da pîl viraşt. AKP hewl dano ke DAİŞ fina-reyna werzo ser payan û prestîj o ke Rojawa de kerd vinî qezenc bikero. Nayî ra hewna zî cayanê zey Semsûr, Riha, Dîlok, Stenbol, Hatay de azayanê DAİŞ rê perwerde danê. Badê perwerde serva qetilkerdiş rişenê ser Kurdan. Nika Bakûrê Kurdistan de zî xeylê cayan de çeteyê DAİŞ bi çeteyanê AKP ra piya hêrişê îradeyê şarî kenê. Hêrişê merdeyanê Kurdan kenê. Mezeleyan, cemxaneyan, camî û cayanê bimbarek kenê hedef, bombevaran kenê. Rixmê qerarê 'bê-çalaktî' yê KCK operasyonê eskerî ramenê. Nê pêrokîn hewldayenê AKP serva hadreyînê weçînayinan ê. Wazenê çimandê şaranê tirkiye de prestîj û îtibarê HDP bivistnê.
Gune weçîntoxî nayî rind bizanê; AKP DAİŞ o, DAİŞ AKP yo. Na raştî zey aw û hewa zelal a. Xalîfeyê AKP erdoğan serva-qandê ke bibo serwezîr her çî giroto ver çiman. Cok ra Amed, Pirsûs û Enqera de bombe teqînay. Serçeteyê AKP werzeno jû sûka Kurdan de, mitîngê weçînayin de Kurdan tehdît keno. Vano e ke şima rey nê dê ma, zey serranê '90'î ma dê şima fina biremnê, bikişê, vinî kerê.
Raştî de tirkiye de çi vurniya?
Çiyê ke nika zey polîtîka û stratejiyê dewlet yenê kerdin serranê '90'î nê ravêrnay? Çiyê ke nika hetê AKP yenê kerdin wexta derbeya 12'ê Îlon 1980'î zî ravêrnay.
Nika zî tirkiye de demokrasî, birabiyen, haştî û serbestî hetê îxtidar ameya hewadayin.
Nika zî tirkiye de roj rojî gonî rijyena.
Nika zî tirkiye de roj û şew vengê tifingan û pirodayişan yeno, qafîle qafîle cenazeyî yenê.
Nika zî qeçek-doman, kal û pîrî werteyê kuçeyan de yenê înfazkerdin.
Nika zî gencê Kurdî yenê kiştiş û meyitê ci pey panzeran de yenê kaşkerdin.
Nika zî meyitê gerîlayanê cenî ra îşkence yeno kerdin, kinc-çinayê ci cira vejenê, kenê viran û meydanan de 'teşîr' kenê, hetê cenazeya ci resîm ancenê û kenê vila.
Nika zî pitikê didi-hîrê aşmî qetilkenê.
Nika zî kam ke vano 'ez Kurd a, ez ziwanê xo wazena, ez xosereya xo wazena tepişenê û erzenê zerre.
Nika zî kam ke tirkiye de behsê serbestiya fikir bikero, kam ke dewlet û îxtidar rexne bikero yeno tehdît kerdin û raştê şîddet yeno.
Nika zî tirkiye de garantiyê weşî û ciwyana kesî çinyo. No lîsteyî û mînakan kes şeno derg û dirêj bikero. La hewce çinyo, yê ke na mesele ra eleqedar benê û taqîp kenê rind fehm kenê.
Cok ra teberê welat, tirkiye û Kurdistan de gerek weçîntoxî şirê ser sandiq û reyna-fina tercîxê xo hetê demokrasî, haştî û azadî bikerê. Gune her weçîntoxê HDP zey aktîvîstê HDP bigurweyo, xo ra piya kesanê bîn zî bero ser sandiq. Çi ke netîceyê weçînayinan dê dewrê newî akerê. Ya xeta faşîzm û derbekar do serkewo ya zî xeta azadî û demokrasî HDP. Bi jû rey kes şeno rejîma dîktatoryal welişno. Cok ra bê rê ma 1'ê Mijdarî de fina-reyna vajê HDP.