Saziya Kurdan yê Avrupa CDK, Civaka Demokratîk a Kurd, dest kerd qampanya zonî.

Ver ra vajîne: Qampanya rinda, la bes niya. Namê xo sero wo, yê qampanya şîndorê xo esto. Bêdem niya. Na zî seweta zonanê ma bes niya.
Onca zî qe ke nê, zonê xo amera xo vîrî. Belka zî mara taye rindekiya zonê xo naskenê û kune ra dime.
Çi hêyf ke hebe kewtîme herey. Naye ra avê, waxtoke honde teknolojî çîne bî, zonê ma est xover, lawikude mend, vînd nêbî.
Ewro merdena zonan hebena herbî yena.
Reye înternet de niyadîme! Mordem biwazo, nêwazo, mecburî na hacet ano kar.
Înternet zî mordemî beno zonanê bînan ser. Zonanê ma de pelgê hewlî çînê û bi taybetiye pelgêke alaqa gencan oncenê xo ser, çînê.
Her çî zonanê bînan dero. Na rîwal ra zî însanê ma zonayîs zonanê bînan ra cenê. Coka na dem de merdena zonan rew yena.
Qomê kurdî hîrîs serrî seweta kamiya xo da pêro û bedelê girşî dayî. Ewro kurdî endî kamiya xora nêsermayenê. Sereberz vanê “ma kurdîme.”
Hetê kamiya netevî ra mesela kurdan nêmenda. La mordem nêşîkîno aynî çî seweta zonî vazo.
Zerrê hîrîs serranê peyenan de herb bî, sîyaset virajiya, la jû zon nêvirajiya. Bi taybetiye Hereketê Sebestiye xeletiyade girse kerde. Zonê ma, zonê xoyê rozanê nêkerdî, tirkî guret. Tabi, zonê ma ke hata ewro amo, naye de heqade girse yê Hereketê Serbestiye esta. La mesela na niya.
Jû qampanya bes niya. Gune qerarî biceriyê. Yanî raştiye de gune jû şoreş virajiyo. Ma kurdîme, hama zonê xo qebul nêkeme. Kombiyayîsan de wirzeme ra vame “qusirê mi de niyamedê, ez zonê xo nêşîkîn qeseybikerî” û niya zonê xora kume dûrî.
Siysetvanê ma pêro eskerakerdîsanê xo bi tirkî danê. Çapemeniye ma de giraniye tirkî sero wa. No hal gune bivuriyo. Zonê serdestî gune zonê ma yê rozane nêbê!
Çapemeniya ma de seweta domonanê ma tewa çîno. Ma hata ewro zonê xo seweta domonanê xo sempatîk nêkerd.
Demê na qampanya de gune qerarî bêrê guretene. Dezgê û saziyê kurdan gune qesê xo jûkerê, pêro jû alfaba biyarê kar.
Bi taybetiye çapemeniye de gune giraniye zonanê ma de bo.
Qampanya gune çarçevê jû plan û program de bi îstîkrar bêro ramitene. Zovîna manê sloganê qampanya “Fam nêbî” nêmaneno û kara xo nêbena.