MEHMET ŞAH ORUÇ / MA / AMED
Qezaya Licê ya Amedî de 2015 ra nata cayêko tede operasyonê leşkerî nêdîyayo dest pêkerdene, qedexe îlan nêbîyo û nêameyo bombe kerdene nêmendo. Heto bîn de zî qeza û dewanê qeza de wextê mahsereyî yo.
2015 ra nata qeza û dewanê ci de rezanê engure ra ti netîce nîno girewtene. Rezê enguran wişk benî û newe ra zîl danî. Cok ra engure zaf kêmî bîya. Dewijan rezan ra nimune girewto û nîşanê pisporan dayo. Pisporan sey sebebi boya barûtî nîşan dayo. Nê dewan ra yewe zî dewa Huseynîkî ya.
Dewa Huseynîkî ke verê cû 20 qazikî şîre rezan ra vejîyayêne, emser tena qazikêk şîre tira vejîyayo. Reyna mahsereyîya dewe qasê 15 rojan dewam kerdêne, labelê emser 2 rojan domîyayo. Dewijan ra Nadîre Harane va ‘emser berdarîye xeylê kêmî bîya’.
Hanîfî Haranî zî dîyar kerd ke ê hesaban ra ameyî ke engure arê bidî û wina va: “Labelê engure çin a ke ma arê bidî. Wexto ke ma seba cigêrayîşê erşawit, netîce negatif vejîya. Ma ra ame vatene ke sebebê ci darûyan ra yo. Goreyê netîceyê tehlîlî sebeb boya barûtî yo.” Vedat Haranî zî qala prosesê helawe viraştişî kerd. Kamuran Harane zî derheqê viraştişê suncixan de melumat daye û dîyar kerde ke serranê peyênan de ê qet berdarîye nêgênî.