Debara bajarê Riha ra yew zî fistiqe ya. Germîya bajarî vejîyaya heta 45 derece û na germîye de hesadê fistiqan dest pêkerdo. Herçiqas ke emser hîna vaya fistiqan dîyar nêbîya zî, fistiqî seba rihayijan çîyêko zaf muhîm o.
Kedkarî serê sibayî rew şonî hêgayan û binê hewayê germî de şert û mercê bêewleyî û pereyêko kêmî xebetîyenî. Cinîyî zî eynî karî kenî, labelê camêrdan ra pereyêko tayêr gênî. Cinîyan ra Afîfe Canpolate vana ‘ez xo zana nêzana ez hêgayan de xebetîyena’ û wina domnena: “Tewr zaf ma germîye ver tesîr benî. Bitaybetî aşma temmuze û tebaxe de hesadê fistiqan dest pêkeno. Binê germî de no kar zaf zehmetin o.”
Canpolate dewamê qiseykerdişê xo de wina va: “Resnayîşê fistiqan çîyêko zaf zehmetin o. Ma leyekanê înan qasê 10 serrî ewnîyenî û dima ra dest bi dayîşê berî kenî. Mîyanê nê demî de ganî şima aşî bikerî. Şima eşkenî eynî dare ra demêko derg fistiqan arê bidî. Ge-ge zî torge dana piro û mesrafê şima yê yew serre veng ra şono. Emser şert û mercê hewayî ver ber kêmî bi, labelê herêma ma de çîyêko winasî nêbi.”
Herçiqas ke 2 cinîyê bînî ke Canpolate reyde xebetîyenî nêwaştî qisey bikerî, labelê dîyar kerdî ke ê camêrdan reyde eynî karî kenî labelê ê camêrdan ra kêmêr pere gênî û reaksîyon nîşan dayî.
JINNEWS / RIHA