12 lejwananê YPG û YPJ, dewa Zormixare de verniyê çeteyan girotî. Nê lejwanan 6 rojan bê mabên eştî xover û bi qehremanî şehîd kewtî. Çeteyanê DAIŞ badê Zormixarê, 8ê tîrmeh de zî êrişê dewa Evdiko kerdî û îşgal kerdî.
Êrişî 15ê Îlone de destpa kerdî
Çeteyan 15ê Îlone de, bi tifinganê giran ê ke Tirkîye ra girotî, tanq û topê ke cayanê cîya ê Iraq û Surîye de vistî dest êrişê Kobanê kerd. Dewleta tirk zî heme hetan ra desteg da çeteyan. Êrişê sifteyin ê bi tifinganê giran, vera deşta dewa Telikê ya ke kişta Çemê Firatî ya ra virazîyay. La xoverdayişo ke qederê Kobanê belû kerd û kewt rîpelanê tarîxî dewa Serzûrî de destpa kerd. Na dew de, 12 lejwanê YPG û YPJ vera êrişanê giran, govenda azadî tepiştî! 12 lejwanan 13 seatan cayê zey deşt de, xover day û bî şehîdê qehreman ê Kobanê. Na xoverdayişa 12 qehremanan rihekê ciya da Kobanê. Çeteyan 5ê cotmeng de, bi êrişekê zaf giranî Girê Miştenûr hedef girotî. Girê Miştenûr rîwalo ke berzîyê Kobanê de bi, wayirê cayekê zaf stratejîk bi.
Destanê qehremanîye
Girê Miştenûr de destanê qehremanîye nûsiya. Lejwanê YPG û YPJ bi rojan veyşan û teyşan dûştê tanqan û êrişanê çeteyan xover day. A roj, Girê Miştenûr de, 27 lejwanan eştî xover û 16ê ci şehîd kewtî. Reyna a roj Girê Miştenûr nûmayişê fedaî yê Arîn Mîrkan rê şahîdî kerd. Arîn Mîrkan xo tanqa çeteyan ver de teqna û nûmayişa fedaî viraşt û bî sembola xoverdayişê Kobanê. Na xoverdayişê tarîxî ra dima pirodayişê Girê Miştenûr vilayê miyanê sûk bî. Lejwananê azadî ke soz day Arîn Mîrkan keye bi keye, tax bi tax Kobanê seveknay û Kobanê DAIŞ rê kerdî mezel. Rayverê Şarê Kurd Abdullah Ocalanî zî, verra êrişan seferberîn îlan kerd û veng da kurdan ke welatê xo bipawê.
Kobanê qeleyê xoverdayişî
No vengdayişî ra dima xoverdayişê Kobanê kewt merhaleyekê newe. Bi hezaran gencanê kurd, sînorê îşgalkaran hewaday û ravêrdî Kobanê. Sînorê Kobanê û Pirsûs de, bi mengana nobet tepişiyê. Başûr, Bakur, Rojhelat, Rojawayê welatî ra pîya Tirkîye, Awrûp ûsb. heme cayanê dinya de kurdî û dostê ci bi mîlyonan kesî seba Kobanê werîştî payan ser. Ê rojî zey serwedarnayişê 6 û 7ê cotmeng kewtî rîpelanê tarîxî. Bakur û Tirkîye de, quwetanê tirk êrişê nûmayişkaran kerd û nezdîyê 40 kesan weşîya xo kerdî vinî. No xoverdayişê tarîxî pêrokîn dinya de veng da. Cok ra 1ê Mijdara 2014 zey ‘Roja Kobanê ê Dinya’ îlan bi. A roj bi seyan merkezê dinya de, nûmayişê seba destegê Kobanê virazîyayî.
Vera peynîyê aşma mijdar de, lejwanê YPG û YPJ destpa operasyonê pak-kerdişê çeteyan kerd û qedeme bi qedeme avey şî. Peyniyê xoverdayişê tarîxî de, 19ê çileya 2015î de, Girê Miştenûr, cayê nûmayişê Arîn Mîrkan çeteyan ra xelesnîya. Erdogan û çeteyê ci yê ke pawitî 1 hefte miyan de Kobanê bikewo, eksê ci Kobanê bi qeleya xoverdayişî. Eynî wext de bi sembolê şeref û rûmetê şaranê dinya.
NAVENDÊ XEBERAN