Dewa Roboskî ya ke girêdayê qezaya Şirnex Qilaban’a de, 28ê Kanûne 2011î de teyareyanê artêşa tirk netîceyê bombevornayen de 34 welatijê Kurd qetilkerd. Vizêr serragêra qetlîam de merasîma vîrarden viraziya. Merasîma ke hetê Roboski-Der û rêxistinanê HDP û DBP yê Qilaban amê organîzekerdin de bi sloganê “verra qetlîaman rayverînê xoser, verra herb haşitî” viraziya. Merasîma serra 4. de dawa ya Roboskî yadê Tahîr Elçî bî. 


“Kiştox Erdogan do hesab bido”

Xeylê parlamenteranê HDP, rayverê HDP û DBP, temsîlkaranê sazgehanê sivîl ra piya, bi hezaran kes tewrê merasîm bî. Merasîm de sloganê “Kiştox AKP-Erdoğan do hesab bido”, “34 canî cuwyenê, Roboskî xoverdano”, “Bicuw xoverdayişê Kurdistan” berz bî.  


Geyrayişê edaletî ramenime
Merasîm de ser nameyê malbatan Narîn Ant damûstayîn wend û hayr ant mahkeme nêkerdişê kiştoxan û qetlîamanê newî ser. Ant vist vîrî ke bi ‘qedexe’ yê vetişê teber ra piya kurdistan de cenî, qeçekî-domanî, gencî yenê qetilkerdin û niya-wina va: “Meyitê dayikan bi rojan kuçeyan de maneno, qeçekî pîzeyê maya xo de yenê kişten. Ant ard ziwan ke, Sûr, Cizîr, Nisêbîn, Kerboran û Sîlopya de, bi  tanq û topan welatijî yenê kişten û vist vîrî ke, tirkiye de weşiya însanan zaf ercan a. Narîn Ant peynî de va: “Ma dê tekoşînê geyrayişê edaletî ra fek nêviradê. 


Wa dewlet mayî ra biterso

Mayanê Roboskî ra Felek Encu zî merasîm de qisey kerd û kesê ke ver xendekan de xoverdanê silamî kerd. Encu va, ez tenya maya kesê ke Roboskî de amey qetilkerdin niya, ez maya pêrokîn şehîdanê Kurdistaniya û wina va: Kesê ke Kobanê ra heta Pirsûs, Cizîr ra heta Sûr’anê Amed xoverdanê silamî kena. Felek Encu tecrîdê verra Rayverê Şarê Kurd Abdullah Ocalan’î rê nêrazîbiyen damûsna û wina va: “Wa dewlet ma ra, dayikan ra biterso. Ma dê tekoşînê xo ra ti wext fek nêviradê. 


Se serra azadî

Parlamenterê HDP yê Riha Osman Baydemîr’î zî qiseyanê xo de hayr ant qetlîamanê dewlet yê nikayî ser. Baydemîr’î aşkere kerd ke şarê Kurd do bi tekoşînî bireso serbestiya xo û wina va: “Se serra 21. do bibo se serra serbestiyê şarê kurd, se serra serbestiya şaranê mazlûm û wina va: “Wa serreyê şima berz bo, şarê ma Rojhelatî ra heta Rojawa’yî, Bakûr’î ra heta Başûr’î verra barbarîzmî xoverdano. Baydemîr’î aşkere kerd ke, aqibetê Enqera zî do zey aqibetê Hîtler’î bo. Baydemîr’î peynî de aşkere kerd ke, raya xelesnayiş îtifaqî ra vêrena ra. Parlamenterê HDP yê Şirnex Ferhat Encu’yî zî mesaja xo de aşkere kerd ke bi qetlîama Roboskî dewlet waşt serreyê şarê kurd çewt bikero. Encu ard ziwan ke îye de serreyê xo nimiz nêkerê û sozê berzkerdişê tekoşînê şehîdan da. 


Kiştoxî nika zî qetlîaman ramenê

Parlamentera Edena yê HDP Meral Daniş Beştaş zî aşkere kerd ke qetlîama Roboskî sembola wehşeta dewleta tirkî ya û wina va: “Verriya 4 serrî ma jû wehşetî rê şahîdî kerd. Dewlet waşt bi perreyan na dawa bigîro. La malbatê Roboskî bi vinderdişê rimetîn damusna ke, mesele meseleyê perre niya. Beştaş aşkere kerd ke, rexmo ke her çî werte de ro, hona dawa ra kes nêame mahkeme kerdin. Beştaş va, ma dê kiştoxanê Roboskî vejernê verniya mahkeme. Kiştoxê Roboskî ewro Cizîr, Sîlopî, Sûr, Nisêbîn û Kerboran de qetlîamanê xo ramnenê. 

Badê qiseyan bi hezaran kes mezelxane û 34 gencan yad kerdî. 

Tenya Roboskî de nê, herzewbîn sûkanê kurdistan û tirkiye yê zey Amed, Dersim, Semsûr, Riha, Dîlok, Wan, Merdîn, Mûş, Agirî, Erzêrûm, Stenbol, Edena, Antalya, Îzmîr, Mugla û Denîzlî de zî nûmayişê yadkerdinê qûrbaniyanê qetlîamî Roboskî yad bî.  


 DÎHA/ŞIRNEX