Key ke birenu est dewlet û hukumatanê tirkî û niqayî, bizonê ke pey ra jû kurd yeno dîna.
Tertelê Roboskî de zî niya bî.
Dewlet û hukumatê AKaPe kewte birenu ver, pey ra Huseyîn Çelîk gina waro.
Cunta AKaPe tertele ra dime hata 12 satî bêveng mende.
Honde waxt ra tepiya cariyê xo Huseyîn Çelîk rusna verê qamera.
Se vat Huseyîn Çelîk?
‘Operasyon de xeletiye biya’
Tertele de ‘qest çîno’
Cariyê Anqara 12 satî tertele ra tepiya niya vat.
Jû tirkî belka niya qesey nêkerdenê.
Belka zî vijdanê tirkî dezenê.
Belka!
Hama jû kurdê AKaPe verê qamera de hen qesey keno ke, ti vana verva to teyîpe qesey kena.
Fek ra cemed voreno, rî de rêça însanî nêosena.
Zaf serdin, zaf gonserdin.
Sawo ke a roze tertelê Roboskî nêbiyo.
Sawo ke a roze hukumatê AKaPe serdest nêbiyo.
Sawo ke dewlet û hukumatê tirkî ora avê qerarê herbî nêgureto.
Raşt, sawo ke Huseyîn Çelîk a roze tam xatirê xo însaniye ra wastenê.
Honde serdin, honde gonserdin.
Waxtêde Hîkmet Çetînî qilêrê Anqara kerdenê pak.
Tabî zerrê demî de ebi xo zî bîbî qilêrin.
Kokê xo kurd bî, hama destu de gonya kurdan biye.
Ebi gonya kurdan qilêriya Anqara şûtenê.
Nika zî Huseyîn Çelîk esto.
No verfekê, qeseykerdoxê, AKaPe wo.
Nika zî Mehmet Metîner esto, ‘Mehmetçîkê, Rescepî.
Yê ‘Mehmetçîkê’ Recepî mezg de bi seyan luyî fetelînê.
Waxtede zerrê hereketê siyasî yê kurdan de bî, nika verê Recepî de beno çewt.
Gorê vatena ‘Mehmetçîkê’ Recepî, mezgê Recepî de zî xêlê luyî fetelînê. No hal înan ano têhet.
Ne hukumatê tirkî, ne dewleta tirkî, teyna nêşîkiyenê û nêşîkînê kurdan honde waxt tertele bikerê.
Her hukumat xorê wertê kurdan ra carî çîneno we û ebi destê kurdan kurdan dano kistene.
Tertelê Roboskî ra 12 satî dima Huseyîn Çelîk ebi eskerakerdîsê xo Şehîdê Roboskî reyna tertele kerdî.
Kurdan her dem tertelê kurdan de ca guret û en karo qilêrin guret xo ser. En dezo giran na wo.