Lejkeran raya Reqa û Minbic birnay û bi desan dewî çeteyan ra xelesnayî. Quwetê Meclîsê Lejkerî yê Minbic û QSD panc rojan de 20 dewî çeteyan ra xelesnay. Fermandaranê Operasyonê Xelesnayişê Minbic’î ra Faysal Ebû Leyla ke 3ê Hezîran de bi dirbetin weşîya xo kerd vinî.
Çarçoveyê operasyonê xelesnayişê Minbic’î de di cepheyê Tişrîn yê operasyonî roja verî resayî pê. Quwetê ke operasyonî mîyan de ca gênê dewa Meqaliq Hesen Axa ra pîya 50 dewokê bînî xelesnay. Heto bîn ra lingê Vakûr yê cepheyê Qaraqozaxî zî 2 dewokê bînî xelesnay. No cephe de çeteyan waştî êrişê bi bombeyî virazînê. Wesayîta bombebarkerdî hetê qûwetanê operasyonî bi tifinga BKC amê teqînayen. Cepheyê Başûr yê operasyonî de dewa Qebîr Êmo û deweka Tuwêl de gureyînê geyrayişî amey ramiten û 6 cenazeyê çeteyan amey dîyayen. Cenazeyan ra pîya 9 tifingê kalaşnîkofî, 1500 guleyê ci, 1 B-7, 4 roketê B7, 1 BKC, 2 yelegê întixarî, 4 bombeyê destî, 1 debanca, 5 guleyê katyûşa zî hetê lejkeran amey vînayen.
5 rojan de 20 dewî xelesîyayî
Çarçoveyê operasyonî de Quwetê Meclîsê Lejkerî yê Minbic û QSD panc rojan de 21 kîlometre ravêr şî û 20 dewî çeteyan ra xelesnay. Herzewbîn panc rojan de 143 çeteyê DAIŞ kişiyayî. Ronişteyê dewanê Minbic xelesnayişê dewanê xo bi coşekê gird û zey roşanî pêşwazî kerdî.
Girê Til Ûm Serrac ke roja verîn kewt bin qonrolê quwetanê operasyonî de zî pirodayişanê vizêr nê perey de 14 cenazeyê çeteyan ra pîya xêlê tifingî û cebilxaneyî amey destgirewten. Teyareyanê Koalîsyonî zî çormeyê na xet de 6 reynî bombevornayen kerdî û netîceyê ci de 12 çeteyî kişiyayî û 2 motorsîkletê ci îmha bî.
Meclîsê Lejkerî yê Minbic roja verî Girê Til Ûm Serrac ke serva çeteyanê DAIŞ cayekê stratejîk o girot bin qontrolê xo û bi nayî raya Reqa û Minbic birna. Til Ûm Serrac 10 kîlometre rojawayê Çemê Firatî de yo. Quwetanê operasyonî sivîlê ke bin zilm, zext û qetlîamanê çeteyan ra xelesnay kirêşnay cayanê ewle.
Minbic nezdîyê azadî beno
Azayê Meclîsê Lejkerî yê Minbic û Fermandarê Sûwar El Minbiç Ebû Mehmûd’î vist vîrî ke ê gam bi gam vera Minbic ke zey qeleya DAIŞ’î ya şinê. Ebû Mehmûd’î aşkere kerd ke çeteyê DAIŞ panîkekê girdî de yê û nayî ra destpa ronayişê mayin û qontrolê berzî kerdê.
Fermandar Ebhu Mehmûd’î da zonayen ke çeteyê DAIŞ sekenê wa bikerê nêşkenê îradeyê lejkeranê Meclîsî bişikînê û wina va: “Ma derheqê rewşê peynî yê Minbicî de xêlê çimeyan ra zonayişî gênê. Goreyê nê zonayişan çeteyê DAIŞ ke dew û mintiqeyan de qontrolî kenê vinî, navendê Minbicî de xendekan kinitenê, wesayîtanê bombebarkerdî kenê hadre. Herzewbîn çeteyê DAIŞ sivîlê ke wazenê sûk ra bivejyê zî manî kenê, kurdê ke sûk de yê eştê hepsî û nezdîyê 50 kurdî qetil kerdê.”
Cerablûs û El Bab’î ra teqwîye waştî
Fermandarê Sûwar El Minbiç Ebû Mehmûd’î vist vîrî ke çeteyê ke Minbic de kewtê tengî Cerablûs û El Bab ra teqwîye waştê û aşkere kerd ke ê domanê Minbic ê û serva xelesnayişê Minbic ê dê her çî bikerê
Ebû Mehmûd’î da zonayen ke Minbic serva çeteyanê DAIŞ zey Reqa û Musîl muhîm o û vist vîrî ke bi xelesnayişê Minbic borîyê nefes yê DAIŞ do bibirnîyo û do çeteyan felç bikero. Ebû Mehmûd’î da zonayen ke serva ke hewcedarîyanê şarî rê bibê cewab Meclîsê Eskerî yê Minbic ame ronayen û aşkere kerd ke dewê ke yenê xelesnayen hetê şarî bi şayî û coşekê gird yenê pêşwazî kerden.
Îşgalê DAIŞ do bîro şikiten
Fermandarê Sûwar El Minbiç Ebû Mehmûd’î da zonayen ke Koalîsyonê Mavênnetewî zî destegê asmenî dano Meclîsî û wina dewam kerd: “Dewijê dewanê Minbic zî wazenê dûştê çeteyanê DAIŞ de lej bikerê. No çiyekê zaf muhîm o. Ma dê bi xelesnayişê Minbic cewab bidê waştenê azadî, edalet, vûrnayin yê şaranê Sûrîye.” Fermandar Ebû Mehmûd’î vend da şaranê Minbic ke paşt mederê çeteyanê DAIŞ û soz da şaranê ereb, tirmen, çerkez, kurd û şaranê bîn yê Minbic ke dê Minbic çeteyan ra bixelesnê. Ebû Mehmûd’î ronişteyanê Minbic ra waşt be bi sebir bê û aşkere kerd ke îyê dê îşgalê DAIŞ bişikînê û Minbicî bixelesnê.
Heto bîn ra Fermandarê Tabûra Şems El-Şemal Faysal Ebû Leyla ke 3ê Hezîran de netîceyê êrişanê çeteyan de bi dirbetin weşîya xo kerd vinî.
ANF/TIŞRÎN