Netîceyê sereştişan de Altûn û Bûlî ra pîya Azaya Meclîsê Şaredarî Cemîle Ataş, Hemseroka Şûbeyê DÎSKî yê Dersim Şukran Yilmaz, Hemserokê DBP yê sûk Mûrat Polat, Hemserokê HDP yê sûk Aslan Çag, Azayê MP yê HDP Alî Ekber Kaya, îdarekarê HDP Huseyîn Dagdevîren û Yaşar Agin, Serokê EMEP yê shuk Mûstafa Taşkale, Temsîlkarê BES yê Dersim Mûsa Kiliç, û Hakan Kavût, azaya Koma Haştî Aysel Dogan girotîyay bin çiman. Kesê ke amey binçim girewten seba îfade girewtişî vejyay dozgerîye. Derheqê dosya de qerarê nimiten ame dayen. Goreyê zonayişan 13 kesî rîwalo ke tewrê protestoyanê binçim girewtiş û tepiştişê parlementeranê HDP û yê Hemşaredaranê DBP bîyê girotîyay binçiman.
Îfadeyê dozgerîn ra dima azaya Koma Haştî Aysel Dogan serbest veradîya. Seba poştdayişî xêlê kes ver edlîye de are bî.
Xesp û tesfiye kenê hedef
Vera binçim girewtişê sîyasetmedaran, ver bana şaredarî damûstayîn ame dayen. Damûstayîna ke panqarta “Îradeyê şarî nîno rehîn girewten” abîya de yardimkarê hemşaredaran Huseyîn Tûnçî qisey kerd.
Sîyaseta demokratîk hedef de ya
Tûnçî binçim girewtişan ra nêrazîbîyen damûsna û nîya va: “Ewro Seray û hikûmet bi hêrîşanê vera sîyaseta demokratîk hedef kena ke qezencanê demokratîk xesp bikero û pêrokîn dezgeh û sazgehan tesfîye bikero. No hedefî de tenya îradeyê sîyasî yê welatijê ke rey dayê ma çîno, yê ke tekoşînê demokrasî, serbestî, têdûştî, heqî danê, bi mîlyonan welatijê ma yê demokrat û wayrê wijdanî kî estê.”
Huseyîn Tûnçî vengê yewî kerd û va; vengdayişê ma tenya paştîdayişê seba yê ke amey binçim girewten nîyo. Vengdayişê ma; seba yê ke tekoşînê serbestî, têdûştî, demokrasî û edalet danê, vengdayişê ma seba xeyalanê xo yê ke bedel danê tekoşînê pîyayî yo. Tûnçî waşt ke desinde yê ke amey binçim girewten serbest veradîyê.
Sêrt de zî vizêr sodir polîsan eştî keyeyê Hemşaredarê sûk Tûncel Bakirhanî ser û Bakirhanî girotî bin çiman. Herzewbîn Agirî, Semsûr, Wan, Edena û Şirnex de zî xêlê îdarekarê HDP û DBP girotîyay bin çiman.
DÎHABER / DERSIM