Hema zî hema cayê dinyaye de cenîyî binê tehdayî de yî, hema zî çîyî bêqîymetan ser ro qetil benî û hema zî sey camêrdî seyyewbînaye nêvînenî û hema zî sey yew merdim nêhesibîyenî, cîddî nêgêrîyenî.
Sey yew meta, sey yew kelmel çîmanê camêrdan de asenî. La raştî na ya? Helbukî dinya destê înan ra weş û geş bîya.
Destê înan ra erjaya bîya û dinya sayê înan xo şinasnaya, wayîrê kamîya xo bîya. Kotî de
destê înan yew çîyî ro ginaya o çî bedilîyayo, xo newe ra viraşto, bîyo pak û weş î.
Heyanê ke camêrdî cenîyan ser ro texirîyayîşanê xo nêvurnî, ewnayî şanê xo yê xiraban ra fek ver ra nêdî hema ko zaf mergê cenîyan biyerî vînîya ma û ma zî bêçare
temaşe bikerî.
Dinya weşî û rindîye ser ro ronîyaya. Xoza heme renganê xo behş kerda merdiman.Tewir tewir
vilikî, tewir tewir nebatî û sewalî pêro zî dewlemendîya dinyaye îfade kenî.
Dinya heme rengan û cîyayîyanê xo reyde weş a.Merdim zî cenî û camêrdî reyde weş o.Û seyyewbînaneyîya camêrd û cenîyî reyde weş û manedar a.
Xora dinya xozaye reyde cuya xo ramena, heme çî goreyê bîyayîşê xo têgêreno. Xoza hetê xozaye ra
xo rê qusir ver ra nêdana. La merdim sey xoza yo.
Heme çîyê nêbîyayeyî dest medimî ra vejîyayî.Qetilkediş, xirabkerdiş, talankerdiş, kiştiş, serûbinkerdiş tim destê merdimî ra bîyo. Hema zî destê xo xozaye ra nêanto. Hema zî qetilkerdişê dinyaye ra fek ver ra nêdayo.
Xora qetilkerdişê dinyaye ra fek ver ra nêdayo na rey hemzayendîya xo ser ro tehakumê xo ronayo. Seke hemzayendîya xo girewta qefes pê kay keno û seke xo ra merdim nêhesibno, vato tim
bindestîya min de bo. Maf û azadî cenîye ra zaf dîyo.
Hanîk dinya sey nê camêrdanê faşîstan têgêrena.Cenî merdim û ferd nehesibîyena. Seke seba xîzmetê camêrdan ra ameya dinya. Yew komel eke cenîyan ser ro texirîyayîşê înan seyyewbînaye nêbo no komel îflah û salîhin nêbena.
Xora averşîyîşê komelan de kistas teknolojî nîyo, kistas ewnayîşê cenîyan de komel senî têgêrena. Eke cenîyî sey camêrdî xo vînenî, sey camêrdî heme gureyan de xebitîyenî yanî xo heme hetî ra azad vînenî o wext no komel yan zî no şar yan zî no mîllet modern yew mîlet o.
Sewbîna cîvatiş zur a û xapînayîş a. Dinyaye de çend dewletî est î zafênî fikrê xo yê nêbîyayeyan terk nêkerdî. Nêwazenî cenîyan sey xo bivînî, wazenî tim cenîyî di hîrê gamî tepayê înan de bibî. Ferasetê xo na hawa xebitnenî.
Helbukî cenîyî azad nêbî camêrdî nêvajî ma azadî, azadî azadîya cenîyan ra vîyarena. Û camêrd zî xo azad nêvîno. Çimkî o azadîya cenîyan nêwaşto ke o azad bibo. Camêrd na hawa xazayîya merdimî xeripnaya. Dinyaye heme çî goreyê xozayîya xo virazîyayî, çew biyero na xozaye bixerîpno, dinya eslê xo ra vejîyena.Nika cenîyan ser ro çîyê nêxozaye est î.
La hêvîya ma a ya ke dinya her tim xirabeyî ser ro tênêgêrena tesil mafdar bo bizeyno. Cenîyî zî mafê xo bigêrî azad bibî, sewbîna dinya çin a, dinya ginayîşê destê cenîyan ra weş a.
Zerweş ESNAW