"Vengê teqînayiş ame. Herkes cayê xo de mend û bêveng bi. Peycoy venge do bîn ame. Ez pey xo weyniya ya ke tayn çî hewa de perriyenê. Mi bado fehm kerd ke nê çî leteyê ganê merdimanê. Herkes cayê xo de şoq bi û mend. Raya ke ma serva-qandê ambulansî akerd ra polîsî amey. Wexto ke teqînayiş bi, jew polîs zî cayê biyayiş de çinêbi. La badê çend deqeyan polîsan meydanî kerd dekerde. Vazdiyay, qîriyay û bi gaz hêrişê dirbetinan kerdî. Hewil day ke kesê ke nêmerdî û dirbetin bî, înan zî bikişê. Meydan pêrokîn bi gonîn. Leteyê goştê kesan vilayê çorme bibî. Badê nîm seat tenya jew ambulans ame, yê bînî zî zaf berey amey. Kiştoxî aşkere yê, ma sucdaran silasnenê. Roja hesabdayen de ma ra bitersê...!” 

Şahida qetlîama Enqera yê 10’ê Cotmeng wendekara Lîse Ekin Sû wina-niya behsê roja biyayiş kerdo. 

Amed, Dersim, Colemerg, Semsûr, Agirî, Batman, Stenbol, Antalya, Manîsa, Îzmîr û bi desan sûkanê Kurdistan û tirkiye ra bi hezaran kesan xo xemilnay, omidê haştî dekerdî zerriya xo û şî Enqera. Enqera de waştî bi veng û renganê xo, bi dêyr û govenda xo, bi qisey û vatişanê xo mesajê haştî, birabiyen, serbestî û çarekerdin berz bikerê. 

Zerreyê kesê ke kewtî raya haştî de, zey Weysel’ê 9 serrî doman-qeçekê zî estbî. Zey dayik Meryem, ma yê 70 serrî zî estbî. La zerriya nê kesê ke zerriya xo bi heskerdişê haştî dekerde kerdî de bombe teqînay. Bi desan genc, cenî, camêrd, kal û pîr’î lete lete bî. 

Fina-reyna derbe û bombe vistinay omidê haşitî. Hêrişê, goveng, horon, zeybek û tilîliyanê şarî kerdî. Dewleta kiştox, fina ser sucî de amê giroten. La, zey ke teba nêbiyo, zey ke bi desan kesan weşiya xo vinî nêkerdo serwezîrê gej werzeno veng veng qisey keno. Vano beno ke ‘HDP bi xo bombe teqînayo’... Qiseyê ci zey îtirafê sucê ci yê. Peycoy ano ziwan ke, lîsteyê bombeyanê ganî destê înan de esto, la veriya ke nê bombeyê ganî xo nêteqînê nêşenê înan bigîrê... Hendayî bi aqil û psîkolojiya şarî ra kay kenê. 

Na îxtidara gonîn, çeteyê kiştox bi nê qetlîaman, bi vatişanê xo şarî rê vanê ke, qandê-serva ke şima ma tenya nêkerd îxtidar şima dê bedelê nay giran bidê’! 

Hewcedariyê vatiş û qiseyanê derg çinyo. Kes xerîbê na dewlet niyo. Ma na dewlet Roboskî ra, Zergelê ra, Amed ra, Pirsûs ra rind silasnenê. Xo ra behsa kerdiş û qetlîamanê verî nêkena. Çeteyê dîktatorê Saray bi zey fermana ke girotî vejyay meydanan û zilmê do winayî kerdî. Çi vatî? Vatî; ‘zey aw do gonî birijyo’! 

 Gladyoya Saray ke haştî û çarekerdin ra tersena waşt bi na qetlîam verniya qerarê ‘bêçalaktî’ yê KCK bigîro. Çi ke no qerar do riyê raşt û polîtîkayanê di-riyî yê AKP teşîr bikero. Çi ke AKP waşt heta weçînayinan no pêvacoyî bi herb, pirodayiş, merdiş, cenaze û kaos bibero. La nê hesabî Qendîl ra ageyray. 

Endî meşrûtiyetê çeteyanê AKP û dîktatorê derg erdoğan’î tirkiye de nêmend. Sîstema ke xo ser fikrê kolonyalîzm, înkar û îmha rona welijyena. Endî wext ame ke şarî derbeya peynî riyê AKP ro dê. AKP zana ke roja hesabdayiş nezdî bena, cok ra tersena û har bena. Nayî ra gune 1’ê Mijdarî de Kurdan ra piya şarê tirkiye yî zî şirê ser sandik û AKP ra goniya qeçik, dayik, genc, kal û pîr ke rijna pers kerê û peyniya ci biyarê.