Vizêr ra na kişt, kurdistanijî kewtî rayê konsolosxaneyanê Tirkîyaye ser. Raydayinê zî hetanî 25’ê citmenge bê maben biramo. Kesê ke xebetiyenê, şenê peyniyê heftey de, şirê konsolosxaneya nezdiyê xo û raya xo bidê. Bi rojan o muhîmînê weçînayinê 1’ê Teşrîne sero vindêriyeno. Zey heme rayan, rayê teverê welatî zî, zaf muhîm ê.
Serkewtinê HDPe yê 7’ê hezîrane de, rolê rayanê teverê welatî zaf bi. HDP o çax, tam 211 hezar û 299 rayî girotî. Bi vatena bîna HDP %20,29’ê rayê, teverê Tirkîyaye de ray girotî. Bi enî rayana zî, teverê welatî de, bade AKPe bî diyin. HDP welatanê zey Swisre, Îtalya, Swêd, Îngilistan, Fînlandiya, Yewnanîstan, Polonya, Ûkrayna, Kanada, Japonya û Makedonya de bî partiya jûwîn. Zafê welatanê bînan de zî, rêzê diyin de ca girot. Helbet wasten heveyna vêşî bi. Bi taybetî amorê rayê welatanê zey Almanya û Fransa de, goreyê wasten nêbî. Lazim bi enî her 2 welatan de zî rayê HDPe vêşî biyayê.
Almanya zî û Fransa zî welatê gird î. Bajar û qezay pêjewîn ra bi seyan kîlometre dûrî yê. Tecrubeyê weçînayinî çinêbi. Organîzasyon goreyê wasteni nêbi. Coka enê 2 welatan de, sandiqanê weçînayinî ra, encamê goreyê wasteni nêvejiya. Xebatê enê rojanê peyênan winî mûsnenê, saziyanê kurd û çoşmanê demokratîk û HDP hedefê xo yê Ewropaye kerdo vêşî. Qandê bireso hedefê xo zî, goreyê 7’ê hezîrane xebatê xo Ewropaye de kerdê vêşî.
Rayverînê HDPe, hinî zey sûkanê Vakurê Kurdistanî û Tirkîya, muhîmî danî xebatanê weçînayin ê Ewropaye. Verî teniya xebatê dîplomatîkî esas girotê. La belê badê weçînayinê 7’ê hezîrane, giranî dayo xebatanê weçînayinî zî. Sernî de Hemserek Selahattîn Demîrtaş parlementer û rayverê HDPe yenê Ewropa. Tewrê xebatanê weçînayinî benê. Mîtîng û kombiyayişan virazenê. Iyê zaf rind zî kenê. Çimkî enê xebatê benê sebebê motîvasyonê rindî.
Eno motîvasyonî bandorê gird encamê weçînayinî ser zî bikiro. Îşaretê hetanî nika jî pozîtîf ê. Bi taybetî welatanê zey Almanya, Fransa, Avusturya, Holanda û Belçîkaye de, goreyê weçînayinê 7’ê hezîrane rayê zaf vêşî bê. Kurdê ke, 7’ê hezîrane de rayê xo day AKP, poşman biyê. Iyê zî lejî ra Erdogan û AKP mesûl vînenê.
Coka hinî mesafe visto mabenê xo û AKP. Qandê 1’ê Teşrîne iyê vanê ke iyê zî rayanê xo bidê HDP. Ancî kesê senî bo AKP bi serê xo bibo hukimat û îmkanê vindarnayinê AKPe çino nêşî sindoqan ser, encamê 7’ê hezîrane fikrê înan zî vurna. Iyê zî vanê ke iyê rayanê xo bidê HDPe.
Nînan het, saziyê kurd, çoşmeyê demokratîk û HDP zî, kemiyinanê weçînayinê 7’ê hezîrane ra ders vet. Kemiyinê ki o çax vejiyay, telafî kenê. Eynî wext de, weçînayinan zey destegê qandê xoverdayişê xorayîrberdişê Vakurê Kurdistanî vînenê. Coka şew û roj xebetiyenê. Wazenê rayanê HDP, goreyê weçînayinê 7’ê hezîrane zaf vêşî bikirê. Wazenê 1’ê Teşrîne bikirê rojê qewirnayinê AKPe. Îşaretê ki ez o vînena, winî mûsnenê kurdê Ewropa û çoşmeyê demokratîk ê tirkîyayijî, 1’ê Teşrîne biaçarnê rojê qewirnayinê AKPe.
Memed DREWŞ