Ewro serragêrê Komployê Mavêndewletî yo. Veriya 17 serran, 15ê Sibat 1999î de Rayverê Şarê Kurd Abdullah Ocalan bi jew operasyonê NATO teslîmê Tirkiye kerdî. Serragêra Komplo de, Kurdistanijî serva protestoyan meydanan de yê.
Operasyonê NATO
Komployê Mavêndewletî 9ê Cotmeh 1998î de destpa kerd. Rayverê Şarê Kurd Abdullah Ocalan 9ê Cotmeh ’98î de Sûriye ra ame vetiş. Ocalan nezdiyê 5 aşman mabêna welatanê zey Yewnanîstan, Rûsya, Îtalya û Afrîqa de şi ame. Rîwalê zextanê Amerîka û menfaatanê siyasî û ekonomîk yê dewletan, kesî Ocalan’î qebûl nêkerd. Ocalan 2ê Sibat 1999î de Yewnanîstan ra şi paytexta Kenya Naîrobî û jû bana balyozxaneyê Yewnanîs de bi ca bi. Hikûmeta Kenya waşt ke Ocalan tebersînor bibo. Ser nay, bi soza şiyînê Hollanda Ocalan’î na waşten qebûl kerd. La teyareya ke 15ê Sibat Naîrobî ra werziya, 03.00ê şew de resiya Tirkiye. Ocalan 17 serriyo bin şert û mercanê zaf giran de, bin tecrîdî de Girava Îmrali de yeno tepişnayen. Ocalan’î wextanê peynî de aşkere kerd ke, o netîceyê operasyonekê NATO û DJA de û bi Komployekê Mavêndewletî de teslîmê Tirkiye kerdî.
Serragêra 18. de Komplo lanet beno
Şarê Kurd 17 serriyo vera Komplo tekoşîn û nêrazîbiyenê xo rameno. Serragêra 18. de zî vera Komplo Kurdistan ra piya, pêrokîn cayê dinya de nûmayişê protestoyî viraziyenê. Welatanê Awrûpa de, Komplo bi rojano, bi nûmayişanê ciya yeno protesto kerdin. La nûmayişê tewr gird, roja Şeme, 13ê Sibat de sûka Fransa Strasbûrg de viraziya. Mitînga ke bi slogana ‘Ocalan’î rê Serbestî, Kurdistan’î rê Statu’ viraziya de des hezaran kesan waştena serbestiya Rayverê xo berz kerd. Kurdistanijê ke seatanê sodir de Strasbûrg de are bî, sifte şiyayiş viraştî û kuçeyanê sûk de vengê xo kerdî berz. Peycoy resyay meydanê mitîngî û heta seatanê şanî mesajê xoverdayiş kerdî berz.
Ocalan do nezdî de azad bibo
Mitîngî de mesajanê KCK, yê Hereketê Ceniyan û Gencan de komplo ame lanetkerdin û sozê berzkerdişê tekoşîn ame dayen. Parlamenterê HDP yê Şirnex Faysal Sariyildiz ke bi telefon tewrê nûmayiş bi, aşkere kerd ke qetlîamê ke Hîtler’î vera Yahûdiyan, Seddam’î zî Helepçe de vera şarê Kurd viraştî, Erdogan zî nika eynî çî Cizîr de keno. Sariyildiz’î da zonayen ke Cizîr nêkewt û xoverdayiş do biramo. Parlamentera HDP yê Riha Dîlek Ocalan zî tewrê mitîngî bî û aşkere kerd ke Komplo nêresa hedefê xo. Dîlek Ocalan dewletê komploger protesto kerd û diyar kerd ke Ocalan ewro bi fikiranê xo azad o û va, do wextê nezdî de bi fizikî zî azad bibo. Dîlek Ocalan da zonayen ke şarê Kurd bi qetlîaman nîno çinîkerdiş.
Partiya muxalefet ya Çep yê Almanya ra Karîn Bînder zî mitîng de qisey kerd û şiyayişê Merkel yê Tirkiye rexne kerd. Bînder sereştiş û qetlîamanê vera Kurdan lanet kerd û vera qetlîaman bêvengiya Jûbiyena Awrûpa protesto kerd. Bînder pêrokîn qûwetanê mavênnetewî ra waşt ke vera Tirkiye bikewê hereket.
Azayê Konseyê Rayverîn yê KNK Tahîr Kemalîzade, Serokê Civaka Îslamî ya Kurdistan Hafiz Tûrhalli, Hemserokê KONGRA-GEL Remzî Kartal zî mitîng de qisey kerdî û muhîmiya berzkerdişê xoverdayişî ardî ziwan. Koma berxwedan zî mitîngî de sehne girot.
Yewnanîstan ra nêrazîbiyen
Komployê Mavêndewletî paytexta Yewnanîstan Atîna de zî hetê seyan kesan protesto bi. Kurdistanijan sûkeka Agîsas Paraskevî ra heta ver Parlamentoyê Yewnanîstan şiyayişê derg viraşt. Peycoy bi komanê anarşîst ra piya meydanê Monastrakî de mitîng viraziya. Badê mitîngî nûmayişkarî bi sloganê ‘Ocalanî rê Azadî’ şî ver balyozxaneyê Tirkiye. Ver balyozxane de qisey amey kerdin û waziya ke komplogeran ra hesab bîro persayiş. Nûmayiş de serva serbestiya Ocalan’î mesajê ramitişê tekoşîn amey dayen. Rêxistinê Yewnanî ke tewrê nûmayiş bi, sozê paştdayişê nûmayişan day.
Îtalya, Brîtanya û Kibris de protestoyî
Vera Komplo Îtalya ra zî nêrazîbiyen amey. Xeylê sûkanê welatî de nûmayişê protestoyî viraziyay. Sûka Bologna de bi seyan kes are bî û Komployê 15ê Sibat ra piya qetlîamê dewleta Tirk protesto kerdî. Sûka Frenze de zî bi desan kesan bana qenala Televizyon RAÎ de nûmayiş viraştî. Derheqê Komplo û qetlîaman de nûmayişkaran zonayişî day sermiyananê RAÎ û waştî ke weşananê xo de ca bidê na babedî. Roma de meydanê Kolseyo de û Grossetto zî meydanê îstasyonî de vizêr nûmayişê protestoyî viraziyay. Ewro zî Mîlano û Torîno de Kurdistanijî meydanan deyê.
Brîtanya de protestoyê Komplo
Paytexta Îngilîstan London de zî him komployê 15ê Sibat, him kî qetlîamê dewleta Tirk amey protesto kerdin. Nûmayişkaran veng day hikûmeta Brîtanya ke desteg nêdo dewleta Tirk. Kibris de kî Komployê 15ê Sibat bi rayşiyîna derg protesto bi.
NAVENDÊ XEBERAN
Komplo her ca de protesto beno
Şarê Kurd vera Komployê dûstê Rayverê xo her ca de ser payan o. Sûkanê Vakûrê Kurdistan û Tirkiye de zî Komplo rê lanet varniya.
Komployê 15ê Sibat qezaya Merdîn Artûklû de bi damustayinê çapemenî ame protesto kerdin. Hemserokê qeza yê HDP Nezîr Akaalp aşkere kerd ke waştî bi Komplo şarê Kurd teslîm bigîrê. Akaalp’î aşkere kerd ke, senî ke Kurdî vera Komplo’yî xoverdayse, ewro zî dê vera faşîzmê AKP xover bidê.
Maskeyê AKP kewto
Qezaya Merdîn Mîdyad de zî Komployê 15ê Sibat protesto bi. Azaya KJA Gulbeyaz Akçay nûmayiş de qisey kerd û vist vîrî ke Rayverê Şarê Kurd Abdullah Ocalan, Îmrali de xoverdayişê do destanî dano. Akçay da zonayen ke, Ocalan’î Komplo ra piya pêrokîn kayê leyminî veng (tol) vetî û maskeyê AKP visto. Qezaya Merdîn Qoser de zî komplo lanet bi. Welatijê ke vejyay meydanan bi slogana ‘PKK şar o şar tiya de yo’ şiyayişê bi meşaleyî viraştî. Qezaya Semsûr Kahta de zî bi aktivîteyan Komplo protesto bi.
Amed, Şirnex û Colemerg
Amed de zî Azayê Meclîsê Mayanê Haştî vera sereştişanê dewlet û Komployê Mavêndewletî vejyay meydanan. Mayê ke vera Sûr kewtî ray ser Cedeyê Hatboyû de vinderniyay. Ser nay dayikan nûmayişê ronişten viraştî. Qezaya Şirnex Sîlopî de zî ser vengdayişê HDP cuwyan vindiya. Nûmayiş de dewleta Tirk amê îqaz kerdin û waştena hewadayişê tecrîdê giran yê vera Ocalan’î ame ziwan. Qezaya Colemerg Gever de zî Kurdistanijî meydanan de bî. Hezaran kesê ke serva protestokerdişê Komplo vejyay meydanan rê polîsan mudaxale kerd. Nûmayişkarê ke vilayê kuçeyan bî bi xopawiten cewab day êrişan.
Batman, Edena û Mersîn…
Batman de zî bi seyan kes ver bana HDP de are bî û waştî hetê Parqa Ataturk ray şirê. Qûwetanê dewlet cede bi wesayîtanê zirxî girot û bi bombeyanê gaz êrişê nûmayişkaran kerd. Ser cewabdayişê nûmayişkaran pirodayişî heta seatanê berey dewam kerd. Edena de esnafan kepengî nêkerdî a û komplo protesto kerdî. Qezayanê Edene yê Seyhan, Yuregîr û Ceyhan de esnafan kêberê dikananê xo nêakerdî.
Herzewbîn qezayanê Mersîn Tarsûs, Akdenîz û Toroslar de zî kepengê esnafî girotey mendî. Edena û Mersîn de vizêr şan de welatijî vejyay meydanan.
NAVENDÊ XEBERAN