Rojnameya Financial Times bal kişand ku Kurdan li “bakûrê Sûriyeyê” ango Rojavayê Kurdistanê rêveberiya gelek bajar û navçeyan bi dest xistiye û têkiliyek baş a van Kurdan bi Başûrê Kurdistanê re heye. Rojnameyê bi bîr xist ku Tirkiye vê yekê ji bo xwe weke gefek mezin dibîne.
Rojnam nivîsand ku ev yek bi kêrî PKK’ê jî tê û bal kişand ku PKK êdî li şûna çalakiyên li cihên cûda û belave, bi komên qelebalix bi ser yekîneyên artêşa Tirk de digirin.
Financial Times ragihand ku ji bo astengkirina kûrbûna krîza li Sûriyeyê, tiştên pir kêm ji destê Tirkiyeyê tên û bal kişand ku Serokwezîrê Tirk Recep Tayyîp Erdogan peyama mudaxelekirina Rojavayê Kurdistanê daye, lê tu kesek bi dilgermî li operasyoneke wiha demdirêj nameyzîne.
Rojnameyê nivîsand ku Tirkiye di polîtîkaya xwe ya dostaniyê ya ji bo Başûrê Kurdistanê jî zêde encam negirt û bi bîr xist ku ji bo pêkhatina koalsîyona di navbera Kurdên Sûriyeyê de Serokê Herêma Kurdistanê Mesûd Barzanî bi xwe navbeykarî kiriye.
Rojnameyê bal kişand ser Kurdên Bakûrê Kurdistan jî û diyar kir ku ji bo Tirkiye bikare bersivê bide giliyên Kurdan dive hewldanên xwe bike du qat û destnîşan kir ku divê Erdogan di makeqanûna nû ya Tirkiyeyê de cih bide parastina hemû mafên çandî yên hemû welatiyên Tirkiyeyê û got; “Erdogan ji bo vê yekê xwedî rolek girîng e, dive bersivê bidin daxwaza xweseriya Kurdan.”
Rojnameyê bal kişand ser krîzên meshebî yên li Rojhilata Navîn jî û diyar kir ku divê Tirkiye dest ji hewldanên xwe yên pê xwe weke nunerê Suniyan nîşan dide berde û îşaret bi xirabûna têkiliyên Tirkiye û Îranê kir.
ANF/LONDON
Tirkiye ji Bihara Kurdan ditirse
Rojnameyê di analîzê de bal kişand ser pevçûnên li Şemizînanê û destnîşan kir ku Kurdên li Sûriye û Iraqê, dê cesaretê bidin Kurdên Tirkiyeyê, hikûmeta Tirk hewl dide ku pêşî li vê yekê bigire.
Rojname nivîsand ku berevajiyê tiştên li Tirkiyeyê tên gotin, li Sûriyeyê tu şerek navxweyî tune ye û got ku Kurdên li Rojavayê Kurdistanê dixwazin xwe ji vî şerî dûr bixin. Rojname îdîa dike ku leşkerên artêşa Sûriyeyê xwe ji bajarên Kurdan vekişandine û piraniya bajaran di bin kontrola PYD’ê de ne.
Di analîzê de hat diyarkirin ku ger mirov ji aliyê perspektîfên stratejîk ên demdirêj ve li meseleyê binêre, divê Tirkiye bikeve nava fikaran û destnîşan kir ku sînorên Rojhilata Navîn ên ku piştî hilweşîna Osmaniyan hatine danîn, êdî têne gotibêjkirin, ev yek herî zêde bi kêrî Kurdan tê.
Rojnameyê da diyarkirin ku di demek ku yekpariya welatên Ereb bi xeteriyê re rû bi rû de ye, du sînorên nîvserbixwe yên civaka Kurdan yên bi Tirkiyeyê re çêdibin û da zanîn ku mirov êdî dikare xeyaleta serxwebûna Kurdan û tirsa Tirkiyeyê ya ji vê yekê bi awayeke aşkere bibîne.
Di analîzê de tê gotin ku ji ber wê jî Tirkiye, bi awayeke dijwar bersiva hemleya PKK’ê ya li Şemizînan dide û bi bîr xist ku hema bêje ji sedî 25’ê şêniya welêt Kurd in û Enqere ji bo bikare Bihara Kurdan asteng bike her tişta ku jê tê dê bike.
QUDUS