Bextwaştoxî ke heremê çeteyê DAIŞ û çeteyê Koalîsyonê Sûrîye ra remenî xo resnenî Kurdistano Rojawan î. Her wina Mûsil û zaf heremê bînî yê Iraqî zî bextwaştoxan verê xo danî Rojawan. Rayberîya Rojawan zî hewl dana ke bi îmkananê xo yê kêm nê bextwaştoxan meyman bikera û verpersê bida lazimeyê înan. Wargehê seba bextwaştoxan ameyî hadrekerdiş de rayberîya Xoserîya Demokratîke ya Rojawanî hewl dana ke verpersê lazimeyê stargeh, awe û werdişî bida. Şeş kampê hîrê kantonan de bi deshezaran bextwaştox cuyenî û na hûmar zêdîyena. Bi taybetî heremê Şehba, Helep, Mûsilî rojane merdim koçî Kurdistano Rojawan kenî labelê Rojawan o ke hewl dano nê bextwaştoxan bi derfetê xo meyman bikero, bi tena yeno veradayîş. Ewropa ya ke seba bextwaştoxan bi mîlyonan pere hetkarî dana Tirkîya, no warî de Rojawan o ke binê ambargo de yo tena verada. Pêroyî heme serpirodayîşê sazîyê warê mîyanêneteweyî yê seba bextwaştoxan xebityenî, bêveng î. Rayberê Xoserîya Demokratîke qiseyê problem û lazimeyê bextwaştoxan kerdî.
400 Hezar bextwaştoxî
Serekê Heyetê Karê Zereyî yê Kantona Cizîrî Kenan Berakat aşkera kerd ke seba kerdoxê nêexlaqî û nêmerdimî yê çeteyê DAIŞ û Koalîsyonê Sûrîye, zêdeyî 800 hezar bextwaştoxî koçê kantonanê Rojawanî kerdî û wina vat: “Na humar roj bi roj zaf bena. Bextwaştoxan bi îmkananê xo pêşwaz kerdî. Nika kampan de zêdeyî 400 hezar merdim cuyenî û beşêko gird o nê bextwaştoxan heremê Şehbayî û heremê bîn ê binê dekkerdişê DAIŞe de yî, ameyî. Demo ke şerwanê Rojawanî, hêrişê çeteyê şiknayî û Rojawan peynî ke bî wayîrê pergalêko ewle, şarê Rojawanî ca û warê xo agêrayî. Heremê bîn ê Sûrîye ra merdim koç kerdî. Koçber verê xo danî cayê ewle û aram. Hûmarêka zaf koçî kantonê Cizîr, Efrîn û Kobanê kerdî. Ma zî hewl danî verpersî bidî lazimeyê înan.”
BERÎTAN SARYA/CÎLO JÎNDAR