Kurd û dostanê Kurdan çar parçeyanê Kurdîstanî, welatanê Ewropa û dinya de vejîyayî raşteyan, hêrişê dagîrkerîye yê dewleta Tirkî şermizar kerd. Kurd û dostanê Kurdan çalakîyan de dîyar kerd ke Rojawanê Kurdîstanî tena nîyo û ti hêz nêşêno Rojawanê Kurdîstanî dagîr bikero. Çalakgêran waşt ke wa herkes vera dagîrkerîye de bivindero.
Dewleta Tirkî roja çar rojî verê bi tanq, top, teyara, sîlehanê giranan û bi çeteyanê xo hêrişê Rojawanê Kurdîstanî kerd. Vera hêrişanê artêşa Tirkî û çeteyanê ci de her ke şono reaksîyonî zêde benî. Kurdî û dostê Kurdan xeylê cayanê dinya de vejîyayî raşteyan hêrs û reaksîyonê xo nîşan dayî.
Sere de Rojawan, Başûr û Rojhelatê Kurdîstanî de û xeylê welatanê Ewropa de Kurdî beşdarê çalakîyanê protestoyî bîyî û vera hêrişanê dagîrkerîye de vejîyayî. Çalakgêran nîşan da ke Rojawanê Kurdîstanî tena nîyo.
Şarê Mexmûrî vera dagîrkerîya dewleta Tirkî de vejîya kuçeyan û bi rayraşîyayîşêk dagîrkerîye protesto kerd. Çalakîye rayberîya Tevgerê Ciwananê Mexmûrî û Tevgerê Cinîyanê Mexmûrî de ameye viraştene. Çalakîye de beyraqê PKK, KCK, YJA-STAR, YPG û YPJyî ameyî akerdene û pankartê ke ser o ‘Tecrîd bişiknê, Faşîzm birijnê û Kurdîstan azad bikerê’, ‘Sere wedarnê, şer bikerê û Rayber Apo azad bikerê’ nuşte bîy ameyî akerdene. Çalakîye de ame vatene ke wa heme ciwanî beşdarê xoverdayîşî bibî.
Silêmanî de şarî va ‘Rojawan yê ma yo’
Bajarê Silêmanî yê Başûrê Kurdîstanî de bi hezaran kesê ke mîyanê înan de nuştox, parlamenter, mamosta, hunermend û alimê dînî zî estbîy, vejîyayî raşteyan û hêrişê dagîrkerîye protesto kerdî. Çalakîye de siloganê ‘Bicuye xoverdayîşê Rojawanî’, ‘Bicuye Rayber Apo’, ‘Serkewtiş serkewtiş seba Rojawanî serkewtiş’ û ‘Terorîst Erdogan’ û sewbîna ameyî eştene. Çalakîye açarîyaye mîtînge û mîtînge de ame vatene ke ti hêz nêşêno Rojawanî dagîr bikero.
Rojhelat de avûkatî raşteyan de bîy
Rojhelatê Kurdîstanî de zî şar seba ke reaksîyonê xo nîşan bido vejîya raşteyan û çalakîyê protestoyî viraştî. Bajarê Sinê yê Rojhelatê Kurdîstanî de grûbêka avûkatan vera dagîrkerîye de çalakîyêk viraşte. Kurdê Xorasanî zî veng da şarî ke wa vernîya Konsolosxaneyê dewleta Tirkî yê Xorasanî de kom bibî û hêrişê dagîrkerîye yê dewleta Tirkî şermizar bikerê.
Rojawan de hêrs her ke şono zêde beno
Kesê ke Taxa Şêxmeqsûdî ya Helebî de ameyî têhet, vera hêrişanê dagîrkerîye de çalakîya protestoyî viraşte. Çalakîye de pankarto ke ser o ‘Osmanîyanê neweyan û dagîrkerîya Tirkan rê nê’ nuşte bî, ame akerdene. Çalakîye de ame vatene ke ê amade yî ke erdanê xo bipawî. Heto bîn ra mamostayanê Tirbespîyê ke vejîyayî kuçeyan zî veng da raya pêroyî ke wa wendekarê Vakur û Rojhelatê Kurdîstanî bêrî pawitene.
Kurdanê Ewropa ra bêmabên çalakîye
Ewropa û dinya de sere de Almanya, Hollanda, Îtalya, Swêd, Fransa, Swêd, Armenîstan û sewbîna cayan de bi hezaran Kurd û dostê Kurdan çalakîyî viraştî. Çalakgêran bi pankart û siloganan çalakîyê rayîrraşîyayîşî viraştî û vera îqtîdarê AKP û MHPyî de hêrsê xo nîşan da. Çalakîyan de siloganê ke dagîrkerîya dewleta Tirkî şermizar kenî ameyî eştene, beyraqe, flama û dovîzî ameyî akerdene.
AMED