Kongreya Komelê Demokratîke (KCD) vera tewqîfkerdişê Hemserekê Şaredarîya Bajarê Girdî yê Amedî Gultan Kişanake, Firat Anli û Verfeka KJAye ya Demî Ayla Akat Ataye û padîyayîşê dezgeyê çapemenîye yê kurdan de ewro îzehetêk da çapemenîye.
Çinî hesibnenê
KCDyî îzehetî xo de va ‘Ewro dezge û warê cuyeyî ke şarê kurdî bi bedelanê girdan qezenc kerdîbî, yenî dagirkerdiş’ û wina domna: “Her tewir heqê kurdan yeno xespkerdiş. Nê hêrişî kerdişanê faşîzmî manenî. No zîhnîyet dest roneno ser heme erjanê komelî, înan çinî hesipneno, hêriş keno û bi qetlîyaman muxalefetî hedef gêno. Her roje no kaos yeno xorîkerdiş û bi no hawa kanalê sîyasetî yeno xitimnayîş. Reyna dezgeyê kurdan yenî îlegalîzekerdiş û kurdî erzîyenî hepisxaneyan.”
Dewamê îzehetî de wina ameyo vatiş: “Ewro hereketê cinîyan ke bi taybetî Kurdistan de pêroyî de zî Tirkîya de rayberî keno û dezgeyê bînî raştê hêrişê hukmatê AKP û dewlete benî. AKP têkoşînê şarê kurdî yê seba azadîye sey îflasê xo vîneno û nê semedî ra her roje hêrişanê xo hîna zêde keno.”
Vera hêrişan de yewîye û hesasîyet
KCDyî peynîya îzehetê xo de wina va: “Ma sifteyîn tewqîfkerdişê Kişanake, Anli û Ataye û padîyayîşê dezgeyê kurdan şermizar kenî. Nê zext û hêrişî nêşkenî ma bidî vindarnayîş. Roje roja vera faşîzmî de xoverdayîşî ya. Ma veng danî hem şarê xo û hetanê demokratîke; wa vera faşîzmî de mîyanê yewîye û hesasîyetî de bibî.”
ANF / AMED