HALÎT ERMÎŞ/ANF/BEHDÎNAN
Endama Konseyê Caardişî yê KCKyî Fatma Adire derheqê polîtîkayê rijnayîş û ajankerdişî yê dewleta tirkî yê ke Kurdistan de dana meşnayîş ser o qisey kerde û vînayîşê xo arde ziwan.
Endama Konseyê Caardişî yê KCKyî Adire va ‘ma 5ê Nîsana 2015î ra nata Rayberê Şarê Kurdî Abdullah Ocalanî ra ti xebere nêgênî’ û wina domnaye: “Bi no hawa wazenî têkilîya mabênê Rayberî û tevgerî de biqerfnî û bi Rayberî û tevgerî tepîya game bidî eştiş. Heto bîn ra bi huqûqo dişmenî nizdîyê Rayberê ma benî. Sey ke avûkatî zî vanî, rewşêka ke malumat ci ra nîno girewtiş, esta.”
Adire dewamê qiseykerdişê xo de va ‘her çiqas ke hêriş û polîtîkayê tecrîdî ser Ocalanî de yenî meşnayîş, heto bîn ra zî seba tasfîyekerdişê îradeya sîyasî 7ê Hezîrana 2015î ra nata hêriş û operasyonî benî’ û wina dewam kerde: “Heto bîn ra vera gerîla de zî hêrişê zaf girdî yenî kerdiş. Nika konseptê çinîkerdişê topyekunî ra xirabêr o. Çimkî herême yenî qedexekerdiş, nêverdanî ke dewijî keyeyê xo ra bivejyî. Dewan veng kenî, zozanan qedexe kenî, merdiman înfaz kenî, bi hawayo kêfî û îşkenceyî merdiman tepişenî û bi rojan tepişte verdanî. Nînan hemînan wina kerdî ke çimê her kesî de normalîze kerdî.”
Polîtîkayê ajankerdişî
Adire bale ante polîtîkayê ajankerdişî yê dewleta tirk ser û wina va: “Nika giranîya xo dayî karê ajankerdişî ser. Demêko derg o ke polîs û MÎT kesê welatperwer û sîyasetê demokratîkî mîyan de ca gênî, taqîp kenî û înan ra vanî ‘ma do şima bitepişî û şima reyde munaqeşeyê çira proses têk şî, bikerî. Ma do vînayîşê şima bigîrî’. Bi raybazê şero taybet, sey ke PKK prosesî xira kerdo, bi no hawa wazenî sereyê merdiman têmîyan bikerî. Wexto ke netîce nêgênî, na rey bi vatişê ‘wa dîyalogê ma û yê şima yê prosesî dewam bikero’ û bi no hawa wazenî karê ajankerdişî bimeşnî. Kesê ke vera nêyî de reaksîyon nîşan danî zî dima ra erzenî keyeyê înan ser de û bi mehneya ‘hetkarî û endamê rêxistine bîyayene’ ra gênî. Derheqê ê kesî de ti cigêrayîş yan zî tehqîqat nêkenî, derheqê ci de şahidêko nimite û gerreyêka zure amade kenî. Bi no hawa ê kesî danî tewqîfkerdiş. Seba ke netîce nêgênî sere danî raybazanê winasîyan.”
Wa ti kes nêbo nobedar
Endama Konseyê Caardişî yê KCKyî Fatma Adire derheqê qoricîtî û nobedarîya taxe de zî va ‘dewleta tirk demê peynî de giranî dayo nînan ser’ û wina dewam kerde: “Wazenî bi pereyan kesan bikerî nobedarê taxe. Ti kes nasname, tarîx, ameyoxa domananê xo, ehlaq û wijdanê xo bi pereyan nêroşeno. Şarê kurd êdî sey verê nîyo û nêyî qebul nêkeno. Ganî ti kes nobedarî û qoricîtî qebul nêkero. Yê ke qebul bikerî zî ganî hetê komelî de bêrî tecrîdkerdiş; lazim o ti kes silam nêdo nê kesan. Ganî ti kes sohbet û dîyalogê înan ke bin nameyê şerê taybet de kenî, qebul nêkero. Kesê ke raştê nêyî ameyo, ganî teşhîr bikero. Bi no hawa wazenî zerrîya şarî de ters awan bikerî. Ganî nobedarî û qoricîtî nêro kerdiş. Rojeva kurdan de têkoşîn û serkewtiş estî. Şarê kurd tarîx de reya sifteyîn a ke hende nizdîyê serkewtişî bîyo.”