Tirkîya de xeta çapemenîya azade wayîrê mîrasêko bi desan serran o û her tim rastê hêriş û cezayan ameya/yena la reyna zî bi bedelanê giranan heta nika estena xo domnaya. Tewr peynî 15ê temuze ra nata xeylê hêrişê çapemenîya azade ser de bîyî û heta nika 12 televîzyon, 11 radyo, ajansê DÎHA û JINHA û rojnameyê Azadiya Welat ameybî padayîş.

Çapemenîya azade ke bi şîyarê ‘raştîyan ra tavîz nîno dayîş’ dest pê weşanê kerdbî û wayîrê tecrubeyêkî gird a, nika zî bi rojnameyêk newe estena xo domnena. Rojnameyê ‘Rojeva Medya’ bi reng, mîyanên û nameyê neweyî dest pê weşanî kerd. Rojname do bi lehçeyanê ziwanê kurdî kurmanckî û kirmanckî weşan bikero.

Qasê wendekaran xebatkaranê nê rojnameyî de zî heyecanêko gird esto. Çimkî her rîpelê nê rojnameyî sey pere demserre tarîxî rê nusenî û xebatkarê rojnameyî zî nêyî ra hayîdar î. Goreyê na rastîye hereket kenî.

Vengîyêka gird virazîyaybî

Wayîrê îmtîyazî yê rojnameyê Rojeva Medya Murat Sekmenî derheqê zextê ke çapemenîye ser o benî de va: Nê demanê peyênan de hukmatê AKPyî sazî û dezgeyanê kurdan ser de zext û tedayî vetî duştê tewr berz. Tewr peynî çarçeweya Qerarnameyê Hukmê Qanûnî de 390 sazî û dezgeyan ke zafaneya înan yê kurdan î qefilna. Hukmat wazeno kurdan rê tepîya game bido eştiş. Nê zext, teda û padîyayîşan ver weşangerîya kurdî de yew vengîya gird virazîyaybî û lazimîya weşanêko kurdî bî.”

Ma xeta xo ra tavîz nêdanî

Sekmenî dewamê qiseykerdişê xo de va rojnameyê Rojeva Medya zî do na vengîye rê bibo cewab û qiseykerdişê xo wina qedêna:  “Rojeva Medya no proses de hetê weşangerîye do rolêko gird bigîro ser xo û rojname do bibo cewabêk. Beno ke hukmat reyna hewl bido pado, la se beno wa bibo, ma do hewl bidî aşkerekerdiş û resnayîşê raştîyan bidomnî. Hêrişî çiqas gird benî wa bibî, ma xeta xo ra tavîz nêdanî.” 


2 rîpelî bi kirmanckî yê

* Rojnameyê ‘Rojeva Medya’ 11ê teşrîna peyêne de dest pê weşanê xo kerd û humara xo ya yewine resayî destê wendekaran. Seba ke rojname do bi hawayo rojane weşanê xo bikero, do her roje heyecanêko cîya wendekaranê xo de awan bikero. 

Rojnameyê Rojeva Medya rîpelanê xo de ca dana babetanê cîya cîyayan. Rojnameyo ke 12 rîpelan ra pê yeno; mîyanê xo de rîpelê cinîye, xeberê polîtîka û cîhanî, rîpelêk seba Rojawanî, 2 rîpelî seba lehçeya kirmanckî, kultur, huner, rîpelê komelî û sewbîna…