Çimê ma heme kurdan Rojawan der o. No çiyek çewt zî nîyo. Uca de yew şorişek girde ameyo kerdiş. Şorişek wina girde yo ke sîndorê kurd û Kurdîstanî rewna ra yo viyarnayo. Rojawan bîyo hêvî heme şaranê Rojhilata Mîyaninî rê. Sewato nêy çimê heme dost û dişmenan uca de yo.
Verê, ma vatê: “Ameyoxê çar leteyê Kurdistanê bi qederê vakûrî ra girêdaye yo.” Goreyê nêy, vakûr leteyo tewr pîl bi û hetê loqomotîfê azadîya kurdistanî. Bi no mezgî ra raver, serranê bol dergî serra 2000’î ma xo Rojhilat û Rojawanî de hertay vêşî rayxistinê ma çinî bî. Rojawan qada Rayverey bî. Qet nêbo Rayver Apo uca da bi û bi no semedî şarê ma yê Rojawanî PKK’î ra dûrî û bê bare nêmendî. La Rojhilat ana nêbi. Heyanî qomploya mîyan neteweyî şarê ma yê nayî ra ciya nêbî. Şarê ma yê vaşûrî partîyanê nîjadperestan ra mendibî.
Di esasê xo de a tezê ma raşt bi. La belê şaş ame şîrove kerdiş. Raşt bî; leteya tewr girde û avera vakûr bî, la belê no nêameynê manaya ternayîş û tenya veradayîşa leteyanê bînan. Vakûrê kurdistanî rayverîya şorişa azadiya Kurdistanî kerdê. Hema zî keno. Di nayî de yew pirsgirêk çinyo. La halê ganî no rayverey tenya bi vakûrî sîndordar nêameyê vînayen. Sey ke ewro yeno kerdiş.
Çar leteyê Kurdistanî de ravêreya şorışa azadîyê ganî o çax dest pê bikerdayê. Yanê mezgê “ilam verêverkan vakûr do bixelisyo; leteyê bînî vakûrî dima ra do bireyê raşt nêbi. Ewro ameyo famkerdiş ke xelisyayiş û reyayîş do pîya bero. Bê guman di rayverey û qordînasyona vakûrî de. Çimkî, birayo gird vakûr o. Helbet heyanî vakûr azad nêbo, kurdistan azad nêbeno. La halê yew leteyê kurdistanî bindest bimano zî vakûr nêşeno xo azad bihesibno.
PDKî na venganeyî goreyê xo weş nirxna
Nîtekîm şert û mercê şorişî sifte vaşûrî de vejîya aşan. DYA mudaxaleyî Iraqî kerd, Kurdistana vaşûrî de otorîteya Sedamî nêmend û şarê ma yê vaşûrî qederê xo vist destê xo. O çax şarê vaşûrî mîyanî de rayxistinbiyîşê ma zexim biyayê se, rayvereya şorişa vaşûrî zî ma do bikerdayîme û averaşîyayîşê tarixa ma de ciya bibîyayê. Sewata ke ma xo hadre nêkerdibî, uca de vengey vejîya û rayxistinek sey PDKî na venganeyî goreyê xo weş nirxna û ame destkewteya nê şarî sero ra ronîşt. Partî hema zî xorexneyanê nêyî dano. Fersendek tarixî ame remnayîş û bi na riwal ra PDK Kurdistanî de bî quwetek gird. Semedê nimce mendişê şorişa vaşûrî zî no yo. Hemkarê serdestan PDK, destkewteyanê şarî girot, berd dekerd xizmetê wayîranê xo. Seweta nêy şorişa vaşûrî hema zî nêmcet mende yo.
Ganî ma qebûl bikerîme ke îta de kêmaneya Tevgera Azadiyê esto. Sey ke Ebbas embaz ano ziwan, polîtîqayek raşt se îmkan û qabiliyeta rayverîya şorişî kerdenê yê PKKî estbî. Hêzê Sedamî Kurdistanî ra ancîyaye dima ra, YNK û PDK asanî de çinibîyê. Şaristan û şarçeyê vaşûrî verê hema Keşan kewtîbîya destê hêzanê gerîla. Verê peşmerge gerîla dekeweno ê cayan û şarî paweno.
Plan û armanc çinê bî
La belê hetê ra çinîbiyayişê polîtiqayek raşt, hetê binî ra zî tersê mudaxeleyê Tirkan riwalî ra gerîla heme cayan ra apeya/ tepa ancîyena û şaristananê destê xo de yê radestî peşmergeyan keno. Esasê xo de mesela tersê mudaxaleya Tirkan zî niya. Goreyê min no yew hincet o. Dewleta Tirk gerîla bikerdayê bahane û mudaxaleyî vaşûrî bikerdayê se, şarê vaşûrî eşkiyayê xo vero bidê û şer bikerê. Mesela a bi ke sîyasetê ma o çax teng mendêne. Hadreyî çinê bî. sewata rayveriya şorişa vaşûrî yew mezg, plan û armanc çinê bî. sewata ney zî leteya vaşûrî o çax lepanê miyanî ra şemitîya û şi.
‘Asayê ma hîra kerd’
Rayver Apo teng mendena sîyasetê ma vîna û rexne kerd. Tenya bi rexne kerdişî ra zî sînordar nêmend, na sîyaseta teng bedilna. Êyî ra tepya çar leteyê Kurdistanî de partî û rayxistînî ameyî ronayîş. Vaşûrî de PÇDK, Rojawanê de PYD û Rojhilatî de PJAK ame rayxistinkerdiş. Amebi vînayene ke kamcin leteyî de şert û mercê şorişê bivejiyo asan se, verê heme leteyan şoriş do uca de avera şina. Seweta nêy zî ganî heme leteyan de partî û rayxistinanê ke bieşkê rayvereya şorişan bikerê biameynê awan kerdiş. Na mezgê newe asayê ma yê sîyasî hîra kerd û vernîya ma akerd. Merdim eşkeno vajo ke çiyo ke berê Rojhilatê mîyanin ma rê akerd, no mezgê newe yê polîtik bî.