20ê Adare de Anqara de polîsan eştbî tayê keyeyan ser û netîceyê sereştişî de muxabîra JINNEWSî Duygu Erole zî tede xeylê kesî tepiştbî. Badê 4 rojan Duygu Erole veradîyaye û muracatê Komeleya ÎHDyî kerde û dîyar kerde ke tayê kesê ke xo sey Tîmê Ewleyîya Raya Pêroyî (KGT) dayî şinasnayîş, aye ser o ajanîye ferz kerda. Erole va ‘mi cayê tepiştişî ra berdî odeya avûkatî’ û wina dewam kerde: “Ê kesî waştî mi reyde qehweyêk bişimî û sohbet bikerî. Labelê mi red kerd. Ê kesan mi ra va ‘Eke qehwe nêşima û ma reyde sohbet nêkera do ti serrêk zîndan de bimana. Bifikire, çira ti tîya de ya? Hende rojnamegerê bînî çîyanê winasîyan nusenî, labelê teber de gêrenî. Meterse, ma endamê dewlete yî’. Mi qebul nêkerd û ez ode ra vejîyaya. Ma do vera nê hêrişan de sere nêronî û karê xo bidomnî.”   JINNEWS/ANQARA