Rojnamegere û resame Zehra Dogana ke rîyê xêzekerdişê resiman, xeberan û parekerdişê medyaya sosyale ra ameyebî tewqîfkerdene, vizêr serbest ameye veradayene.
Zehra Dogane seba ke wextê qedexeyê tewbervejîyayîşê qezaya Nisêbînî ya Mêrdînî de resîmî xêz kerdî û medyaya sosyale de pare kerdî û derheqê domanêk de xebere viraşte bi îddîaya ‘Propagandaya rêxistinî‘ ameyebî tewqîfkerdene û nêzdî hîrê serran caza dîyabi ci.
Dogane ke 2 serrî yo zîndan de yena tepiştene Zîndano Grewte yê Cinîyan ê Tarûsî ra serbest ameye veradayene. Dogane hetê embazanê xo ra bi vilikan ameye peşwazîkerdene.
Polîsanê Tirkî destur nêda ke Dogane vernîya zîndanî de eşkerayîyêk bide. Dogane dima ra eşkerayîyêk daye û nê vatî: ‘‘Hetêk ra seba ke ez zîndan ra vejîyaya şa ya, la hetêk ra zî seba ke mi embazê xo, xo dima verdayî ez dejaye ya. Zîndanan de grevê vêşanîye esto û her roje rewşa weşîya xoverdayoxan xidar bena. Çalakîye ke rayberîya Leyla Guvene de ameyî destpêkerdene ganî veng bidiyo înan.‘‘ Dogane ard ziwan ke a ça bena wa bibo do karê xo rê dewam bikero.
MERSÎN