Rojnameyê Xwebûnî no hewteyî zî bi nuştoxê newe û têdeyêko zengîn resa wendoxê xo. Rojnameyo ke hewteyin yeno çapkerdiş no hewte bi manşete ‘Korona form dano cuya ra’ vejîya û no hewte koordînatorê Weqfa Mezopotamyayî Mîkaîl Bilbil heqê ziwan û kitabê weqfa ‘Rayberê Raştnuşteyinî’ persê rojnameyî cewab kerd.

Nuştox Sîdar Jîr zî beşdarê nuştoxê rojnameyî bî. No hewte nuşteyê Munewer Azîzoglu Bazan, Adar Şaman, Mizgîn Ronak, Felemez Ulug, Şervan Azad, Remezan Tûnç, Selîm Temo, Mem Avba, Rohat Alakom, Reyhan Îke, Cemîl Oguz, Dildarê Amedê, Feratê Dengizî û Înan Eroglu rojnameyî de ca gênê. Seba Vîrûsê Koronayî kewtiş û vejyayişê zaf bajaran ameyo qedexekerdiş û rojname nêşîno bajaran, no ser zî rojname do êdî pdfê heme rîpelan keyepelê xo ser o biweşîno.

Nuşteyê Edîtorî yê heqê weşanê dîjîtal wina yo:

“Silam wendoxê ma Xwebûnî ra; no demêk o ma vera zehmetîyan de bi ziwanê dayika xo rojname vejenê, no zî seba ma kêfweşî û serberzî yo. Vîrûsê Koronayî êdî pêroyina Dinya de vila bîyo. Rojê Koronayî de zî ma vat eke hewte de rojêke zî bibo ma do têkoşîn bidê  xo biresnê heskerdeyê ziwanê Kurdî û agahîyan bar bikê. Bêşik sey xebatkarê rojnameyê ma zî tedbîranê xo girewtê, kedkarê rojnameyî no demêk o keyeyê xo de manenê û keyeyê de xebatê xo domnenê. Hewteyê rojêke ma 3-4 embaz yenê têhet û rojnameyî hadre kenê.

Korona bîyo parçeyêk zî cuya ma. Her çiqas babetêka kûrewî bibo, ewqas zî babetêka cuyayî yo. Her kes xo tecrîd keno, her çik beno online û dîjîtal. Dinya de zaf rojname derbasî xebata dîjîtal bîyê. Nêweşî resaya astêka wina ke ma zî nêçare yê tay qerarê newe bigê. Nê hewteyî ra pey, ma giranîya xo bidê xebata rojnameyê dîjîtalî ser o ango online. Ma do hewna her hewte eynî roja rojnameyê xo de hadre bikê û keyepelê xo ser o biresnê wendoxê xo ra. Ma wazenê heme zerrîdarê ziwanê Kurdî keyepelê www.xwebun.org ser o ma bişopînê.

Her wina seba arşîvê rojnameyî û seba kesê ke wazenê halê kaxizî bi dest bivisnê ya zî xo ra arşîvan bivirazê, ma do hûmarêka kêm matbaayî de çap bikê. Ma do rojnameyê aşma rayêkî yanî 4 hûmaran bi kargoyî wendoxan ra bierşawê. Kesê ke wazenê rojnameyê aşma rayêkî bi pêroyin bi dest bivisnê wa name, peyname, adres û telefonê xo e-maîlê ma; rojname@xwebun.org ra bierşawê. Ma mezg û laşê xo heme vîrûsan ra pank bikê.” 

MERKEZÊ XEBERAN