Bi hezaran bextwaştoxê ke rîwalê şerê mîyanî yê Shurîye verê xo day Çûkûrova, vêşîyê înan xêman de ciwîyenê û hêgayan de xebetyenê. Bextwaştoxê ke hêgayan de karanê giran de bi hewayê ercan kar kenê, bi hesreta roşananê welatê xo yê. Bextwaştoxan ardî ziwan ke ê hardê xo ra dûrîyê û bi sebebê nayî seba înan roşan çîyek îfade nêkeno û bê mane yo.
‘Ma zey koleyan ciwîyenê’
Bextwaştoxanê Sûrîye ra Elî Ehmed ke karê hêgayan keno vist vîrî ke roşan nêşîyo ver kêberê înan û va, ‘Eke roşan amebiya ver kêberê ma, ma dê no halî de nêbîyayba. Ehmedî dîyar kerd ke o do roja roşanî de xêma xo de ronişo û bibermo.
Roşan ameyo, ma se bikerê?
Eynê Rondî zî va, “Roşan ameyo, la ma se bikerê. Roşan seba kesê ke hard û welatê xo ra dûr nîyê yo. Ma nê cayan de zey koleyan ciwîyenê. Roşan seba ma nêameyo.
Welatijo bi nameyê Mihemed Salihî zî da zanayîş ke o Kobanê ra şîyo Edena û no 3 serrî yo xêman de ciwîyenê, hêgayan de xebetyenê. Salihî aşkere kerd ke eke roşan de sînor ra destûr bîro dayîş, o wazeno şiro Kobanê û roşanê xo ewja de ravêrno û wina va: “Wexto ke ma welatê xo de bî, ma roşanan de amey pêhet. Nika zî ma dê tenya xêman de ronişê. Nayî ra qe maneyê roşanî seba ma çin o.
Cinîya bi nameyê Edûlê Ehmed zî da zanayîş ke roşan seba înan teba îfade nêkeno.
EDENA