Hora jû roza zonanê dayike esta. UNESCO asma payîza wertî yê serra 1999 de, 21ê gucige jê roza zonê dayikan îlan kerde. No qerar wastena dugela Bangladeş ser ame guretene. 2000 ra na het kî her serre 21ê gucige de zonî yenê ra vîrî.
KNK kî roza 14ê gulane jê roşana zonanê kurdî îlan kerda.
Ma seweta her çî jû roşane vîneme. Seweta her kesî jû halete dame.
Ça niya keme, tam famnêkeme û heqa nînan kî ci nêdame. Eke heqa nî karî ci dîme, zaf karode rind o.
Binge erzeme, pirr nêkeme.
Besenêkeme îmajê ci rind virajîme, atraktîf kerîme. Hen virazeme some.
Haletêke ma dame, wertê qomî de çiqas yenê naskerdene, îmajê xo çitur yo, naye sero honde nêvindeme.
Însanêke teverê ma derê, çiqas qiymet danê na kar, ya zî ma nî însanan çiqas onceme zerrê na karî, naye sero sarê xo nêdezneme.
Mirê hen yeno ke, ma bi xo kî honde qiymet na kar nêdame.
KNK xêle kurdan nuner keno. Qerarêke da, gune pêro cografya kurdan ser tesîrê xo bibo. Mesela siyasetî zovna ya, hama no zon o.
Lewê naye de kurdî seweta zonê xo se kenê, sene gure kenê, no zî persode bîn o.
Hondeke ez zonen xelê sazî û dezgeyan de zonê kurdî, zonê kommunîkasyonî niyê. Pê zonî kar yeno kerdene, dima caverdîno. Îta de mordem gune qewxa xorê dîqqet bikero.
Ma, merdena zonê xora qesey keme, hama verva na merdene bi pêro teqeta xo nêgureyeme.
Teyna ma ke Avrupa de niyada, ma zonê xo se vîneme, hebena beno zelal. Xelê dugelan de mekteban de heqa zonê dayike musayena ama dayene. Bêrê bivînê ke, kurdî domonanê xo mekteban nêrusnenê. Manê xo zaf yê. Ebi taybetiye însanê ke seweta kulturê xo danê pêro, siyasî yê, domonanê xo mekteban nêrusnenê. Aybode giran.
Merdena zonê xora ma bi xo sermiyanîme.
Leto jede siyasetvanê ma waxtoke kombiyayîsan de qesey kenê, vanê: qusirê mi de niyamede ez zonê xo nêzon.
Hukumato faşîst seweta jû puşiye 11 serrî ceza dano domonanê ma, ma zonê sarî xorê kerdo zonê kommunîkasyonî.
Zonê ma ke ewro verê dêsan de sey mendo, bê sitare mendo, guna xo vilê ma dera.
Na guna en jede vilê sazî û dezgeyanê ma yê sîyasî dera. Rayveriya kulturê zonî rind nêna kerdene.