Semtê Allermöhe yê Bajarê Almanya Hamburg de Kurdistanijî sey her serr emserr zî roşan de ameyî pêhet û sey gelenegê welatê xo roşanê remezanî bûmbarek kerd.
Kurdistanijê Allermohe bi serrano roşananê xo sey komîn pîroz kene. Gurenayîşê roşanî yew hefte cuwaver dest keno ci. Hêver vijak êrziyena ke kam cinî çi pojena beno safî û yo salon kîra bena. Rojê Roşan camêrdî semedê nimajkerdişî şinî Camiyê Şêx Seîdî. Cinî zî xo û qijanê xo fînenî arîyê, wer û şîrneya piya şinî cayê bûmbarekkerdiş û sifreyê rî-erd kene ra. Nimajê roşanî ra dima camêrdî zî yenî salon. Vêrnî de şar roşanê yew bîn bûmbarek keno. Bado zi werwerindê xo piya barkene. Per bîn ra qijî semedê gaxûna benî riyez, low nanî destanê pîlanê xo û pêrûn danî arîye. Hûnca xebatkarê Meclîsê Şarê Kurd û Camiyê Şêx Seîd ê Hamburg zî tewrê bûmbarekkerdişê roşanî benê, rojdemî ser o qal kenê û derheqê gurenayîşê xo de zûnayîş bar kene.
Cinî kultirî danê ciwiyayene
Îdarekaranê Cemeatê Îslam ê Kurd ra Hc. Cemîle Baybarz ke bûmbarekîyanê emserr de qisey kerd eleqa ûnt dînê Îslam de yewbîyayîş û barkerdişî ser û hina va: “Ewrûpa semedê şaran binan sey xo kerdişa gureyena. Wazena ke piyerê şarî sey înan serdin û tûmayin bî. La ma semedê merdimiye û pawitişê kultirê xo tewr şarê xo yenê pêhet û wahar yew bîn vecyene.“ Hecî Cemile vist vîrî ke têna Roşanan de nê zewna zî çimê inan ho yo bin ser. Eke yo keratê de bi, o bîn cad vazdano yardim.
Paştdayena ercîyayî
Îdarekara Camiyê Şêx Seîdî ra Hc.Kamîle Çorman zî dînê Îslam de muhîmînê paştdayenê arde vîrî û vat: “Aşma Remezan aşma barkerdiş û paştdayena. Ma zî na aşma erciyayi de her fitar de camiyê xo de şûm da. Hûnca fitir û zika zî ma semedê cayanê xoverdayîş ê Bakûr dayi arîye. Xebatê camî pê girdbiyayîşî ramenê û Kurdistanijê Hambûrg elaqa pil miyejnenî ra.“
‘Waharê Bakûr bivejime’
Azaya Hareketê Ceniyan ê Kurd ê Ewrupa Muşerref Çakas zî eleqa ûnt lejê Bakûrè Kurdistan ser û vat: “Hikumetê AKP bin namê Îslamî bajarê ma vêşnay-rijnay. Qij ra pîl şarê ma qetil kerd. Rixmê piyerê keratiye şarê kurd çuwêk nida, sare berz xo ver da.“ Aktivîsta Hereketê Cenîyan dej û hêrsê xo arde zûn û vat: “Ma hay Ewrupa de la yo pêr ma ho welat de. Cuweka çi heyfo ke ma nêşkenê roşanî pê tûmê roşanî pîroz bikere.“ Çakas herişê AKP rê bêvengiyê Ewrupa sey wertaxînê sûcî hesîbna û vat: “Cizir, Nisêbîn , Gever, Şırnex, Sûr û xelyek cayan binan ê Bakur de, tekoşîno tarixi diya . Gerek ma zî pê çalakiyana wahar Bakur bivece. şarê Kurd êr ra tepiya pêd gum nêerzeno. Ma kerd xo çeng, hetûn serkewtine tekoşînê ma remeno.
SEVCAN ÇAKAS
Qijan Gaxûnî şirawitî Bakûr
Rexisteneniye kurdistanijanê Allermöhe Qijanê înan de zî xo miyetra. Qijan ra Çewligij Sarya-Wisar qaxunê xo (perê ke Roşan de dayî arîye) Qijanê Gever û Nisêbîn rê şawena. Hûnca xelyek qijan bînan zî vat ê zî qaxûnê xo tewr qijanê Bakûr bar kene. Pê wesîleyê Roşanî kurdistanijanê Allermöhe hêna xoverdayîşo tarixi ê Bakûr silûm kerd û soze berzkerdenê tekoşînî da.
Zûnê dadî heqê esasî yo
Per (heto) bîn ra bûmbarekkerdişê Roşan de Kurdistanijan semedê perwerdeyo Kurdiya dest kerd ariyesayişê îmzayan. Kursistanijê ke Allermöhe de nişene ruwe wazene ke qije inan mekteb de kurdî bimûsî. Îmzayî rayveriyê roniştoxanê Allermöhe ke îdareyê Camiya Şêx Saîd ê Hamburg de ca gene Hc. Zeki Baybarz û Hc. Îlyas Çakas de diyay ariye. Welatijan zî nayî re kêfweşînê xo arde zûn û zazayan zazakî, kurmancan zî kurmancî vijna.
Çakasî muhînê zûnê dadî ser vindert û vat: “Mekteb de zûn dadî mûsnayîş heqê tewr esasî yê merdimî yo. Ma zî no heqê xo şuxulnenî û wazene ke qijê ma mektebanê Elman de kirdkî bimûsî û no semed ra zî xebatê ma dewam kene.