Gulan roşnaya xo to ra guretîbî
Baxçeyê bano ke resmê to tede dardekerdbî rindek bî. Kedê destan ci ra herekîyêne. Hevalanê to o rind miqat kerdîbî. Gulêrî bi gulanê xo yê reng bi rengan û bi boya xo ya weşe kerdêne roşnaya çiman û cîgeran. Gulê sûrî qasê rûyê to roşnî bî. Qey înan roşnaya xo rûyê to ra guretîbî.
Guretîyade efsunkare
Ez tam duştê to de nîştbî ro. Çimê mi dêsî de tayê fetelîyayî amayî to ser o dardekerde mendî. Roşnaya rûyê to o ant xo. Demêko derg ez nêşikîyaya înan to ra bicêrî. Mi to de nîyada. Nîyada. Nîyada. Ez nîyadayîşê to ra mird nêbîya. Çimê to yê ke tede çila tavistî pêroyê rûyê to pîştbî, roşn dayêne.
Cilê gerîla zaf şikîyaybî to ra, zaf. Mazêra kîşta to, awa ke to tayê sereyê xo kerdîbî çewt û aznaybî ci, bi to ra hende bibî yew ke mi têser nêvete aye maxrurîya xo to ra guretbî yan to aye ra. Şima têde biaheng bî. Ez to de gurete menda. Guretîyade efsunkare.
Ti her şewe asmên ra ma rê çim şiknenî
Îfadeyê rûyê to? Ez do nika ey senî tarîf bikerî. Ez xo bierzî bertengê kamcîn çekuyanê nê ziwanê ke ez dîwaneya ci ya û o kî maşuqode zaf nazdar o…
Domanode çelesiz yo ke zereyê çimanê xo de çelesiz-çelesiz huyeno, wayîrê eşqode pîr û pak, bi exlaqê xo pîştrast, tawo ke bêro waştene egîdode sey zinarî, leyê waştiye de pemeyî ra nermêr, hem cengê xo de hem aştîya xo de merd…
Cengê pawitişê Qestel Cindo
Eke vengê hevale ra mebîyêne mi do hîna zaf derg to de nîyadayêne. Mi do hîna xeylê wext dinya to ya delale de raywanîye bikerdêne û bîyêne ke ma bikewtêne mîyanê xoşeberade germe. La ez neçar bîya ke dinyaya to ya rindek û delale ra vecî û bêrî na dinyaya ma ya qaşo raştkêne.
Ti cengê pawitişê Qestel Cindo de bîbî astare… Û ez zanena ti her şewe asmên ra ma rê çim şiknenî. Ti welatê qemerî rê çim şiknena.
* Efrîn-Cûmke, 24 nîsane 2014
ŞEYDA ASMÎN