Ez ge-gane şina wextanê verênan. Merdimanê verênan ser o ponijena. Gelo merdimî verê raver bîy yan yê nika. Ez ziwanê kurdî ra ewnîyena. Lehçeyê xo zaf ê, fekê xo zafêr ê. Ê yê ke no ziwan raver berd ra merdim şeno vajo merdimê kan û nezan bî? Ney, merdim nêşeno wina vajo. Çunke înan ziwanêko winî raver berdo ke roja ma ya ewro de ci ra fam kerdiş zehmet o. Hende dewlemend o, merdim şaş maneno. Eke ê merdiman yew ziwano hende dewlemend raver berdo, bêgûman înan zaf biaqil û raver bîyê. Fina no ziwan senî bêperwerde neqlê yê peyê xo ra kerdo? Ma yê nika nê zemanî de cuyenê, wina vanê la merdimanê verênan sîstemê perwerdeyî zaf xurt awan kerdo. Her kesî xo mîyan de gedeyî perwerde kerdê. Yanî perwerde merkezî nêbîyo, xocayî bîyo. Hetê serdestan ra ney, hetê komelî ra dayîke û pîyan perwerde raver berdo. Ke no perwerde zaf bihêz û saxlem o. Çunke seba merdimîye û rindîye perwerde ameyo dîyene. Qandê cû roşnvîrê wextanê verê heme mayî û pîyî bîyê. Kalik û pîrikan winî perwerde dayo ke perwerdeyê înan ameyo resayo heta wextê ma yê ewroyî. Ewro tekelî ronîyayê. Perwerde ser o zî tekelî ronîyayê. Perweredeyêko saxlem û rast dewletan mîyan de hema vaje nêmendo. Qandê cû roşnvîrî nêresenê. Heqîqete her ke şino bena vindî. Merdimanê verênan de wijdan û exlaq raver bî. Merdimanê nika de bîyî tay. Coka perwerdekarî goreyê menfeatê xo û îqtîdarê xo perwerde danê. Êdî teknolojî zî raver şîyo. Coka her kes xo rê personelê ke bişo teknîkî bikar bîyaro, wazeno. Yanî kes nêvano wa gede û gencan de şexsîyet raver bikewo. Gelek kesî vanê wa muçeyê (meaş) mi û cuya mi ya normale bibo, bes o. Kes heqîqete ser ro nêşino. Meselî hemine bîyê xo mird kerdiş û xo xemilnayîş. Cewher de teba nêmendo, heme çî bîyo şikil. Badê nê kerdenan o ke yewo sey R. Tayyîb Erdogan beno serekê yew dewlete. Roja ma ya ewroyine de hewcedarîye bi xo newe ra destgirewtiş esto. Nêke hîna zaf do buglateyî bêrê merdimîye ser. Sazgeh û dezgehanê mîyan dewletî, prof û mirofê cîhangîrî, roşnvîr û perwerdekarî ganî newe ra xo dîzayn bikerê. Nêke merdimîye do xo bi xo xo biwero. Hêjayêno, tehluke gird o. Qandê dewletan û serekan û hukmatan roşnvîrî zî sucdar ê. Roşnvîrê ke xo teslîmê sîstemî kerdê, roşnvîrê ke seba sermaye qeleme xebitnenê, yew fermandarê leşkerî ra vêşêr zirar danê merdimîye. Medya û medyaya komelkî se ra neway destê serdestan de yê. Eke yew şexsîyet rojane xo kontrol mekero, beno ehmaq û şino. Komel no het ra bêpawitene ameyo verdayene. Êdî kes çi vîneno ci ra bawer keno. Kes hewcedarîya fikir kerdişî nêvîneno. No hetê mezgî ra merdiş o. Herinda ke merdimîye bêra no derece orta ra wedaro başêr a. Ganî roşnvîrî na rewşe ser o vinderê. Verêverkan xo ser o vinderê. Xo raver berê. Eke winî bî, problem sere ra çareser bî, bandura xo şêligan ser o zî keno. Şêligî zî şenik-şenik yenê xo û benê şexsiyetê saxlem. O çax nê dewletê gewende zî nêşenê xo rê winî rehet mêrkujan peyda bikerê.