No semedî ra xoza û ganîyî ke serdê zimistanî de xo ancênê pêser û bê lebat vindenî, bi ameyîşê wisare cemedo ke bedenê înan de bi akewtişê tîje helîyenî.Wexto ke merdim nê raştîyan seba Newroza emserrên gêno dest aye çax merdim muhîmîya Newroze hîna baş vîneno.
Yeno zanayene ke hukimatê AKP û dewleta tirkî weçînayîşê 7’ê Hezîrane ra dima konseptêko gird ê şer da destpêkerdiş û çarçiwa no konseptî de bi seyan merdimî bi awayo hovane ameyî qetilkerdiş. Rayna qeza û şaristanê Kurdistanî bi tanq û topan ameyî xirabekerdiş û merdimî bi benzînî awayo ganî ameyî veşnayîş. Senî ke wextê Asurîyan de Dehaq bi sereyê merdiman ra qaleyî viraştî se taybet no demê peynî de sey zilmê Dehaqî, zilmêko gird ser kurdan de ame kerdiş.
‘Şima nêşkenê ma bitersnê’
No semedî ra Newroza Amedî ya emserrên zaf muhîm bî. Hetê çapemenîya hetgirî ra propogandayê sîyakerdişî ameyî kerdiş, mîyanê şarî de vatişê ‘Newroze de do teqîyayîş bivirazyo’ ame vilakerdiş, zaf cayan de firazkerdişê Newroze ame qedexekerdiş û hêrişî ameyî kerdiş. Her çend ke nê heme ameyî kerdiş zî beşdarbîyîşê Newroza Amedî zaf baş bî. Her çend ke bi seyan ciwanê kurdî ameybî qetilkerdiş û deja înan hîna teze bî û zaf qeza û şaristanan de hêriş û qetlîyamî domyaynê zî bi taybetî şarê Amedî û şarê kurdî bi wayîrvejyayîşêko gird, herikîyayî qada Newroze û adirê Newroze hîna girdêr kerdî.
Cenî, doman, extîyar her kes bi cilanê xo yê renginên, dekewtî raşteyê Newroze. Na Newroze de şarê kurdî mesajê ‘Şima çend hêriş û qetlîyaman bivirazî zî nêşkenî ma bitersnî û adirê Newroze bimirênî’ da hukimatê AKP û dewleta tirkî û dijî polîtîkayê Dehaqê eyroyên ruhê Kawayê Hemdem Mazlum Doganî û heme şehîdan ganî kerd. Rayna şarî bi israr waştena azadîya Rayberê Şarê Kurdî Abdullah Ocalan qîrayayî.