Demserrê hamnan û payîzî de awa Berajê Rojava kêmî bîye. Semedo ke dewleta tirk awa Firatî girewtbî, cok ra awe kêmî bîbî. No tesîrê xo cereyanî ser de zî kerde û cereyano ke berajî ra ameyêne zî kêmî bî. Bajarê ke tewr zaf nêyî ra tesîr bîyî Cizîr, Hesekê û Qamişlo bîy.
Babete ser o Mudurê Cereyanî yê Kantonê Cizîrî Ekrem Silêmanî qisey kerd.
Na awe qîm nêkena
Silêmanî qiseykerdişê xo de va ‘seba ke awe kêmî bîya, heme berê Berajê Rojava nêxebetîyayênê’ û qiseykerdişê xo wina domna: “No zî bî sedem ke cereyan zî kêmî bibo. Semedo ke hukmatê AKPyî awe birna, wina bî. Awa ke ameyêne beraj saetêk de 100 metre bî û no zî seba şuxilnayîşê berê berajî qîm nêkerdêne. Destpêka zimistanî awa berajî zêde bîye û berê berajî baş xebetîyayênê. Nika seba ke varan zêde bîyo, dewleta tirk nêşkena awe bibirna. Nika 3 berê berajî xebetîyenî û cereyan zêde bîyo û saetêk de 120 mega wat cereyan reseno Merkezê Mebrûka yê Cereyanî.”
Silêmanî dewamê qiseykerdişê xo de bale ant vilakerdişê cereyanî û wina qedêna: “Cereyan sey yewbînan heme bajaran rê yeno vilakerdiş. Bajarê Qamişlo, Hesekê, Dirbêsîyê, Amûdê, Serêkanîyê, Şedadê û Holî hemînan rê cereyan dîyeno. Seba ke cereyanê Til Temir, Dirbêsîyê, Amûdê û Serêkanîyî baş bî, ma giranî da ser Hesekê û Qamişlo. Heta ke awe zêde biba, do cereyan zî zêde bibo. Nika Hesekê û dewê ci rê 12-14 saetan cereyan yeno dayîş. Qamişlo de zî cereyan rojane 8 saetan ra heta 10 saetan yeno vilakerdiş.”
HÊLAN CELAL / ANHA / GIRKÊ LEGÊ