Coka ma jî zey gerîlayan bi tedbîr hereket kerdê. Gerîlayan se vatê, ma goreyê înan hereket kerdê. Wastenê înan ser, ez û Alî Guler, ma binê jû gozêr de rakewtê. Hetanî saetanê herey ê şew, ma siyasetê lej ê Erdogan û AKP sero qisey kerd.

***

Vera seatanê şewray, vengê tiyaranê lejî ma kerdê aya. Çoşmeyê saet 4:40 de, vengê bombekerdin ame. Badê çend deqeyan ancî vengê teqayinê girdî ame. Cayê teqayin ma ra heveyê dûrî bi. Coka ma nêzanayê, tiyaranê lejî kotî hedef giroto. Badê 2 saetana xebera siya resê ma. Hedefê na fin ê artêşa tirk dewa Zergelê bî. Jew fermandarê HPG vat ki, peyniyê bombekerdin de xeylê sivîlî kişiyayê. Ma hema xo kerd hedre û ma vera dewa Zergelê kewtîmi ray. Dewa Zergelê zaf dûrî nêbî. Raya ci weş bî. Coka ma bi erebeya şiyê.

***

20-30 kîlo metre dûrî ra jî dûmanê dewa Zergelê sero aysayê. Her fina ki ma biyê nezdî dûman biyê vêşî. Adirê bombeyano ki bibi sebebê veşayişî, daristan veşnayê. Wexto ki ma resaymi cayê komkişteni ma şoq biyê. Çimki 5-6 banî bi erda bîbî jew. Kesî vatê qayê, zelzele biyo. Ê saniyeyan de, dîmenê zelzeleyê Wan û Marmara amey vîrê min. La belê dîmen ê zelzelî û felaketê xozayî nêbi. Sebebê ê dîmenê ma şoq kerdî bombeyê qazan ê tirk bî.

***

Bombebaranê siftayin de 2 dewijî şehîd kewtî bî. Dewijê bînî qandê alîkarî hema vazdayê cayê êrişî. La belê badê çend deqeyan tiyaranê tirk anci bombey varnaynayê. Bi êrişê didiyina dewa mahla jorîn ê Zergelê açariyêbî zey cayê cenazeyan. Leteyê bedenê dewijan vilayê çoşmey bîbî. 8 kesî şehîd kewtîbû û vêşiyê 15 kesan jî bîbî dirbetinî. Ma dîmenî antî û detayê komkişten girotî resnay Sterk tv û heme çapemeniya azad.

***

Heme çî çiman ver de bi. Dewleta tirk rast ra rast dewijî hedef girotîbî. Komkişten viraştbî. Dewa Zergelê bîbî hedefê dewleta tirk. Dewa Zergelê jû dewa gird ê çoşmeya. Nêweşxane, mekteb, camî û xeylê dikanî jî estê. Nezdiyê 30 keyey estê. Bi vatena bîna heme çî çiman ver de bi. Texmîn o bi dewleta tirk bi zanabiyayiş dew hedef girota. Bi enê êrişa wazena dewijan Qendîl ra biremino. Kesî nêpawitê dewleta tirk vejiyo, dewa Zergelê zey kampa PKK bimûsno. Rayverê tirk bê şerm werîştî estinê dew înkar kerd. Îdîa kerd ki, Zergelê dew niya, kampa PKK ya. Heta werîştî xeberê ma jî, zey “îdîayê alçaxîn” hesibina. La belê çiyê ki ma çimanê xoya dî û kameyanê ma ant îdîa nêbi, alçaxîn û sûcê merdimînê bîn ê dewleta tirk bi.   


Memed DEWREŞ