Sey ke yeno zanayîş 16ê nîsana 2017 de Tirkîya de referandûmê bedilnayîşê qanûno bingeyî do bêro kerdiş. Hemwelatîyê Tirkîya do sindoqan de îradeya xo nîşanê heme het û bawerîyan bidî. Alimê sûnî û pîrê elewîyan veng dayî heme şaran ke sindoqan ser de baldar têbigêrî. Babete ser o Pîrê elewîyan ra Serekê Komeleya Kulturê Elewîyan Hasan Kilavuz û Îbrahîm Yuceyo ke 30 serrî Dîyanet de xebetîyayo, qisey kerdî.
Ma hetê înan de yî
Yuceyî qiseykerdişê xo de va ‘goreyê bawerîya îslamî, ganî merdimî bi îradeya xo ya azad qerarê xo bidî’ û wina dewam kerd: “Îslamîyet de yeno vatiş ke ‘wexto ke şima qerarêk danî, bêrê têhet û yewbînan reyde qisey bikerê, dima ra zî qeraranê raşt bidê û vila bikerê’. Ma do tercîhê xo hetê raştîyan de bidî. Tercîhê ma hetê şarê bindest û mazluman de yo. Hêzo gird tena aydê Homa yo.”
Ma sultanan ra zaf ant
Kilavuzî qiseykerdişê xo de waştişê elewîyan ard vîr û wina va: “Ma heme nê erdan ser de cuyenî. Heme kesê kamil, hemwelatî û lîderî baş zanê ke bedilnayîşî seba çi yenî kerdiş. Ganî ameyoxa domanan bêro fikirîyayîş û goreyê ameyoxe qerarî bêrî girewtiş. Ganî qerarê referandûmî goreyê terazîya wijdanî bêro dayîş. Elewî ti wext vera koşk, sultanan û emîran de sere nêronayî. Ez bawer kena ke şar do heme selahîyetan nêdo destê kesêk. Welatê ma destê sultan û qesran ra zaf ant. Wa padîşah û sultanî newe ra nêrî welatê ma û sîstemê axatî newe ra nêro awankerdiş."
DÎHABER / MERSÎN