Vera hêrişê dagîrkerîye yê dewleta Tirkî de xoverdayîşê şarê Vakur û Rojhelatê Kurdîstanî dewam keno. Fermandarê QSDyî ra Baz Kerkûkî dîyar kerd ke wa şar bizano ke ê do heta dalpeya peyêne ya gonîye xoverdayîşê xo bidomnî. Komîteya Caardişî ya PKKyî zî daye zanayene ke her keye û ziqaq do bibo meterîsê şerî.

Artêşa Tirkî ke demêko derg bi vera Vakur û Rojhelatê Sûrîye de gefan werdêne, bi teyare, tanq, sîlehanê giranan û bi çeteyanê xo dest bi hêrişê hewayî kerd. Hêrişî roja 3. de dewam kenî û çarçewaya hêrişan de teyarayan cayê ke tede sîvîlî mendênê, bombe kerdî.

Hêrîşî Serêkanîyê, Girê Spî, Kobanê û sewbîna cayan de dewam kenî. Dagîrkeran hewl da ke Serêkanîyê de bejahî ra bikewî erdanê Vakurê Sûrîye. Hêzê Sûrîyeya Demokratîke (QSD) vera hêrişanê dagîrkerîye yê artêşa Tirkî de dest bi pawitişî kerd. Heta nika 4 tanqê artêşa Tirkî ameyî îmhakerdene.

Destpêk ra nata pêrodayîşê şîddetinî qewimîyenî û netîceyê pêrodayîşan de heta nika ame vatene ke 7 dagîrkerî ameyî kiştene, 3 dagîrkerî zî birîndar bîyî. Nînan ra 5 cenazeyî destê QSDyî de yî. Reyna Serêkanîyê de 5 çeteyî ameyî kiştene û 5 çeteyê DAÎŞî ke waşt hêriş bikerî zî bi saxî ameyî tepiştene.

Kurdî xeylê welatanê Ewropa de payan ser o yî

Seranserê Ewropa de bi çalakîyan hêrişê dagîrkerî yê dewleta Tirkî yê vera Vakur û Rojhelatê Sûrîye ame şermizarkerdene. Çalakîyan de hêrişê dewleta Tirkî yê vera Kurdan de ameyî şermizarkerdene û rayapêroyîye ra hîsgêrîye ameye waştene. Sere de Almanya, Fransa, Swîsre, Swêd, Avusturya û sewbîna cayan de çalakgêrî vejîyayî raşteyan û hêrişê dagîrkerîye şermizar kerdî.

Derbeyê girdî dîyayî dagîrkeran ro

Fermandaranê QSDyî ra Baz Kerkûkîyî va ‘ma zaf hewl da ke no şer nêvejîyo, labelê înan şer de israr kerd’ û wina dewam kerd: “Coka wezîfeyê ma o yo ke ma zî şarê xo bipawî. Ma heta nika derbeyê girdî dayî dagîrkeran ro. Ma soz dabi şarê xo ke ma do înan bipawî, ewro ma goreyê soza xo hereket kenî. Wa şarê ma baş bizano ke ma do heta dalpeya peyêne ya gonîya xo xover bidî û qezencanê şarê xo bipawî.”

QSDyî welatan rê sipasîyê xo kerdî

Heta nika sere de welatê Ewropa, welatê Ereban û sewbîna xeylê welatanê bînan vera hêrişê dagîrkerîye yê dewleta Tirkî de reaksîyon nîşan da. QSDyî hesabê xo yê Twîtterî ser o mesajêk weşêna û bitaybetî welatanê Ereban rê sipasîyê xo kerdî. QSDyî mesajê xo de wina vato: “Erebîstano Siûdî, Mîrtîya Ereban ya Yewbîyaye, Bahreyn, Urdun, Lubnan, Lîbya, Misir, Kuveyt û Îraqî rê û hukmatanê Brîtanya, Fransa, Hollanda, Kanada û Almanya rê siapsîyanê xo kenî.”

Her keye û her ziqaq do bibo meterîsê şerî

Komîteya Caarişî ya PKKyî zî îzehetêk da û dîyar kerd ke ewro şerê mendene û çinbîyayîşî  dest pêkerdo. Komîteye dewam de wina vato: “Wa şarê 4 parçeyan bizano ke tarîxî yewna rey wezîfeyê temsîlkarîya merdimîye û azadîy dayo ma. No zaf zehmetin o û bedelê ci zî giran o, labelê deynê ma yo ke ma nêyî bica bîyarî. Ma şehîdanê qehremanan ê Vakur û Rojhelatê Sûrîye vîr anî û ma hêzanê xoverdakaran rê serkewtiş wazenî. Nê hêrişî serrgêra 21. ya destpêkê Komploya Mîyanneteweyî de dest pêkerdî. Vera dagîrkerîye de do her keye, ziqaq bibo meterîsê şerî. Ma veng danî hêzanê PKK, HPG û YJA Starî ke wa çalakîyanê xo zêde bikerî.”

 

MERKEZÊ XEBERAN