ALÎ KOÇER / ANF / AMED
Partîya Şaran ya Demokratîke (HDP) netîceyê weçînayîşê 24ê Hezîrane de se ra 11.7 rayî girewtî û 67 parlamenterî erşawitî meclîs. Na hûmare ra 9ê ci parlamenterê Amedî yî. Parlamenteranê HDPyî yê Amedî ra Semra Guzele derheqê tecrîdo ke Rayberê Şarê Kurdî Abdullah Ocalanî ser o yeno domnayene ser o qisey kerde û vînayîşê xo arde ziwan.
Guzele dîyar kerde ke cinî û kesê ke îxraç bîyî, do seba wedarnîyayîşê tecrîdî têkoşîn bidî û wina domnaye: “Heta ke Rayberê Şarê Kurdî Abdullah Ocalan bireso azadîya xo, do têkoşînê xo bidomnî.”
Guzele dewamê qiseykerdişê xo de va ‘ma bi xebatêka başe 9 parlamenterî erşawitî meclîs’ û wina dewam kerde: “Seba embazê ma yo desin zî îtîrazê ma domîyenî. Herçiqas ke waştî ma binê bendê weçînayîşî de biverdî, labelê ma netîceyêko baş girewt. Ma do goreyê waştişê şarî hereket bikerî. Bitaybetî ma do seba aştî û demokrasî xebatan bikerî. Waştişê ma yê tewr esasî, tecrîdo ke Birêz Ocalanî ser o esto, bêro wedarnayîş. Tecrîd şexsê Birêz Ocalanî de ser şarê kurdî ra yeno domnayîş. Rayîrê aştî û demokrasî Îmrali ra derbaz beno. Cok ra yê ke nînan nêwazenî, tecrîdî kûr kenî.”