ROJBÎN DENÎZ ANF / BEHDÎNAN
Qetilkerdişê Parîsî ke 9ê Çeleyê 2013 de bî û 3 cinîyê şorişgerî Sakîne Cansize (Sara), Fîdan Dogane û Leyla Şaylemeze ameybî qetilkerdiş û sey dewamê komploya mîyanneteweyî ya 15ê Sibata 1999î yeno vînayîş, 4 serran pey xo de verda.Babete ser o gerîlayê HPGyî Alîşer Pîro ke qetilkerdişê Parîsî ra dima beşdarê gerîla bîyo, qisey kerd.Gerîla Pîrî va ‘Heta ke mi qetilkerdişê Sakîne Cansize eşnawite, mi aye nêşinasnayêne’ û qiseykerdişê xo wina domna: “Wexto ke mi eşnawit, cuye seba mi vindete; çimkî sucê merdimî ameybî kerdiş. Sakîne Cansize, Leyla Şaylemeze û Fîdan Dogane kam bîy? O wext mi dest bi cigêrayîşî kerd û mi fam kerd ke embaza Sara abîdeya merdimî, wijdan, heskerdiş û hîsêko ke seba merdimî têkoşîn dana ya.”
Wendekarê Sakîne
Pîrî dewamê qiseykerdişê xo de va ‘mi netîceyê cigêrayîşê xo de dî ke dewletêka bi hezaran serran o ke bi zulm, wehşet û qirkerdiş virazena, esta û vera dewlete de kesêka bi hawayo nêters vindena’ û wina dewam kerd: “Mi kîtabê aye de dî ke Sara hepisxaneyî de vera îşkence û hêrişê wehşetan de xover daya. Cinîya ke mi nas kerd, qehremanêk bîye. O wext merdim fam keno ke wijdan çî yo û bi wijdan cuyayîş çîyêko senîn o. Kitabê xo de vatbî ‘madem ez dişmenî reyde ameya têrî, o wext ganî ez bi hawayo gird xover bida, teslîmbîyayîş îxanet o’ û ez nê vatişî ra zaf tesîr bîya û mi waşt ez biba wendekarê aye. Çimkî zaf çîyê ke ez aye ra bimusa estbî. Wexto ke mi embaze Sara şinasna, mi nezanîya xo fam kerde. Embaze Sara seba bîyayîşê mi yê mîlîtanê PKKyî cesaretêko gird da mi.”
Îxanetê cuyayîşî yo
Pîrî va ‘famkerdişê Sara û sey aye cuyayîş merdimî kêfweş keno’ û qiseykerdişê xo wina qedêna: “Hetê bindestan de ca girewtiş, pawitişê merdimî yo û çîyêko zaf weş o. Pawitişê zalimî îxanetê merdimî yo. Vera zaliman de vindetiş, vera înan de sere nêronayîş karê wijdanî yo. Cok ra merdim ruhê aye bido cuyayîş û cuyayîşî rê wayîr bivejîyo, o wext merdim eşkeno xoverdayîşêko gird nîşan bido. Ancax o wext merdim eşkeno tim qezenc bikero. Bîyayîşê mîlîtanêko gird ancax karê merdimanê wijdaninan mumkun o. Ganî ma tim muhakemeya wijdanê xo bikerî û mîyanê cuye de wina hereket bikerî.”