AZAD ARARAT
Sîma! Yew domana qijkeke ya kurdan a. Pîyê ci Partîya Pêşverû ya Rojawanê Kurdîstanî de gureyê partîye keno. Wexto ke DAÎŞ gale kerd, pîyê Sîma şer de cayê xo girewt û Kobanê sevekna.
Maya Sîma yew cinîya keyeker a. Aye, mamostatî kena, rayberîya Yekîtiya Rewşenbîrên Kantona Kobanê de cayê xo girewto, endama KNK ya û Meclîsê Surîyeya Demokratîke de cayê xo gêna.
Sîma wayîrê may û pîyêko winasî ya. Sîma jêhatî ya. Bitaybetî çalakîyan de cayê xo gêna. Mezgê xo raver o. Wexto ke dewleta tirke dewêka Girê Spî de Sara şehîd kerd; Sîma zaf kewt ver, zaf pê dejaye. Sîma verê ke keye ra rayîr kewa û şira beşdarê merasîma Şehîd Sara biba, maya xo ra vana wina-wina rîyê mi xêz bike. Badê cû Sîma bi xembarîyêka girde reyde şina merasîma Şehîd Sara. Merasîme de maya ci no fotografê ke cor de ro anto û mi rê erşawito. Mi va ez nê fotografî wendoxanê keyepel rê pare nêkera nêbeno.
Dişmen senî keno wa bikero. Bezreyê azadîye her roje ajanê neweyan dano. Ruhê Sara û Sîmaya qijkeke jî do nê welatî de azadî û serberzî ya biciwîyo.