Şarê Girê Spî xoverdayîş de israr keno

Bajarê Girê Spî de şar dagîrkerîya Osmanîyan ra nata hertim raştê tedayanê rejîmê ke ameyî awankerdene, ameyî. Şarî heta nika vera rejîmê Baasî de sere nêronayo û vera çeteyanê DAÎŞ û grûbanê bînan de têkoşînêko gird dayo. Şarê herême nika zî vera hêriş û dagîrkerîya dewleta Tirkî de zî xover dano.

Netîceyê hêrişanê dewleta Tirkî de Sara Mûstafaya 6 serrî merde û dayîka aye Fatma Şêx Mihemede wina va: “Gelo dewleta Tirkî ya dagîrkere erdanê ma de se bikero? Kênaya mi bi guleyê înan ameye qetilkerdene. Kênaya se kerd bi înan? Erdogan terorîst o û domanan qetil keno.”

Reyna hêrişan de bi nameyê Şamîl Mûstafa Ahmedî de kesêk amebi qetilkerdene. Pîyê ci Mûstafa Ahmet El Mûstafayî va ‘wexto ke lajê mi birîndar bi, ma qezaya Akçakale de tedawî kerd’ û wina domna: “Ma 2 rojî ra pey taburcî kerd. Doktoran vatbi çîyêkê ci nêmendo. Labelê wexto ke ma agêrayî keye, bedenê lajê mi de sîyatîyî virazîyayî. Ma berd nêweşxane, labelê wefat kerd. Badê ke vejîya werte ke guleyo ke lajê mi ginayo, jehrin bîyo. Ma êdî erdanê xo de wazenî ke huzir bibo. Dewleta Tirkî çira domananê ma qetil kena.”

Ma do têkoşînê xo bidomnî

Rojnameger Gulîstan Mihemed Alî û Îbrahîm Ehmed zî netîceyê hêrişan de birîndar bîbî. Gulîstan Mihemed Alî va  ‘ma wexto ke qewimîyayîşan taqîb kerdênê, birîndar bîyî’ û wina dewam kerde: “Herçiqas ke destê ma de makîneya fotografî û kamera estbî zî, înan ma hedef girewt. Dewleta Tirkî wazena çîyê ke sînor de qewimîyenî, binimina. Ê se bikerî zî ma do têkoşînê xo bidomnî.”