HAYRÎ DEMÎR MA/ANQARA Xeylê parlamenterê HDPyî 4ê Teşrîna peyêne ra tewqîfkerde yî û ceza dîyaya zafaneyê parlamenteran. Parlamenterê ke ceza dîyaya înan, nînan ra yew zî Abdullah Zeydan o. Çend rojî verê 8 serrî 1 aşme cezaya ke dîyaybî Zeydan, cezaya ci ameye tesdîqkerdiş. Parlamenter Zeydanî reaksîyon nîşanê dîyayîşê cezaye da û va ‘huqûqî talîmatê AKPyî bica ard’ û wina domna: “Şarê ma do 24ê Hezîrane de cewab bido yê ke nê zulmî ma rê rewa vînenî. Sey mehkemekerdişanê bînan de wextê mehkeme û îstînafî de huqûqî talîmatê AKPyî bica ardo.” Zeydanî dîyar kerd ke AKPyî weçînayîşanê 7ê Hezîrane û 1ê Teşrîna peyêne de nêşêna bi HDP û wina dewam kerd: “AKP ke weçînayîşan de nêşêna nika bi destê huqûqî hewl dano ma ceza bikero. Yê ke hewl danî bi destê huqûqî sere bidî wedarnayîş, wa baş bizanî ke ma heta peynî girêdayeyê şar û sîyasetê xo yî. Ma sere zanayêne ke do wina bibo. Ma zanayêne ke do cezayanê girdan bidî ma. Ma do xoverdayîşê xo bidomnî. Şarê ma do 24ê Hezîrane de cewabêko gird bido kesê ke şarê ma çinî hesibnenî û zulmê şarê ma kenî.”