Qeyûm Cûmalî Atîlla ke vizêr verîya ke şiro Şaredarîya Sûka Pîl yê Amed pêrokîn personel, gurekar û azayanê meclîsî eşt teber. Dima ra zî qeyûmê rejîma îşgalî Attîla bin sîya protestoyan de ravêrd odeyê meqamî. Bado ke Hemşaredaranê Sûka Pîl yê Amed Kişanak û Anli tepêşîyay gurekaranê şaredarî Salona Meclîsî de destpa nûmayişê roniştişî kerdî. Vizêr bado ke qeyûm Atîlla şi şaredarî, polîsan waşt bi zorî gurekaran bigîro bin çiman. Gurekaran bi slogananê “Serok Gultan rûmetê ma ya”, “Serok Firat rûmetê ma yo” xover day û nûmayişa xo teber de ramitî. Bi seyan polîsî zerreyê bana şaredarî de bi ca bî, şaredarî açarnay qereqolî û kesî nêgirotî zerre. Atîllayî keyepelê şaredarî girot.
DBP: ’Ma dê serbikewê
Hemserokanê DBP tayînkerdişê qeyûmî yê Şaredarîya Sûka Pîl yê Amedî ra dima Amed de kombîyayişê çapemenî viraşt û aşkere kerdî ke ê qedexeyanê dewlet nêsilasnenê û dê xover bidê û serbikewê. Kombîyayişa ke Hemserokanê DBP Kamûran Yuksek û Sebahat Tûncel ra pîya xêlê Parlementerê HDP û îdarekarê DBP tewr bî Salona Konferansê yê Wedat Aydin ê Bana DBP de virazîya.
‘Dewra derbe destpa kerd’
Kamûran Yuksekî da zonayen ke înan verîya 2 rojan kombîyayişê Meclîsê Partî viraştîyo û qewimyayişê peynî qisey kerdîye. Yuksek da zonayiş ke çîyo ke nika yeno kerdiş derbe yo û wina va: “Tarîxê Amedî de 2 reynî qeyûm ame vînayen. Yewê ci wextê derbeya 12ê Îlone yê Kenan Evrenî, ya bîn zî wextê AKP û Reîscûmhûrê Tirkîye Erdoganî de amê vînayen.” Yuksekî aşkere kerd ke ewro zî wazenê qeymeqameke ke Enqere ra rişnayê Amed îdare bikerê. Kamûran Yuksekî aşkere kerd ke wextê derbeya 12ê Îlone de rêxistinê civakî yê sivîl û çapemenî senî amê vînayen se, nika zî bi eynî rengî yenê vînayen. Yuksekî vist vîrî ke ê na dem zî zey dema derbe vînenê.
‘No qeder nîyo’
Hemserokanê DBP Kamûran Yuksekî da zonayen ke ê dê neyra tepya zhi gureyînanê xo yê dûştê derbe tenzîm bikerê û va, ‘Ma dê xoverdayişê xo yê dûştê derbeya AKP gird bikerê. No qederê ma nîyo, ma dê nayî ti wext qebûl nêkerê.”
Hemseroka bîn yê DBP Sebahat Tûncel zî vist vîrî ke ê dê neyra tepya vajê ‘Derbeya AKP rê nê’ û na çarçove de xover bidê. Tûncel aşkere kerd ke AKP ya ke şarî ra desteg nêgirot, wazena bi zorvajî dest rono îradeyê şarî ser o. Sebahat Tûncel va, dûştê nayî de vindertiş wezîfeyê her kesî yo.
ANF / AMED