Seke yeno zanayîş 11ê êlula 2016î de hetê Wezîrîya Karê Zereyî ra qayûm tayînê Şaredarîya Cizîrî ya Şirnexî amebî bîbî. Qayûmo ke tayînê şaredarîye bî, nizdîyê 100 karkerî karî ra vetî. Herinda nê karker û xebatkaranê bînan yê şaredarîye de merdim û endamê AKPyî ameyî bicakerdiş.
Verê Qeymeqam Ahmet Adanur sey qayûmî tayînê Şaredarîya Cizîrî bîbî, la dima ra Faruk Arican ame tayînkerdiş. Şaredarîye de keso ke tewr zaf bitesîr o, Sereka Polê Cinîyan ya AKPyî Hatîce Atane ya.
Seke yeno zanayîş Atane her ca de dîyar kena ke aye kênaya manewî ya Serekkomar Erdoganî ya û hetê tayînan ra yeno vatiş ke na kes hetê Erdoganî ra ameya wezîfedarkerdiş. Heme organîzasyonanê fermîyan de na şexs tewr vernî de ca gêna û eynî wext de na şexs berpirsîyara girewtişê karkeran a zî. Ame musayîş ke pêro pîya 5 buroyê na şexsî estî û heme şîyayeyê nê buroyan hetê şaredarîye ra yenî dayîş.
Ekîbanê taybetinan awan kena
Seke yeno zanayîş demanê peyênan de kursê ke merkezê asîmîlasyonî yî, hûmara înan her ke şono zêdîyenî. Yeno dîyayîş ke na şexs nê merkezan de gêrena û propagandaya AKPyî kena. Atane heta nika xeylê karanê şaredarîye de merdimanê xo bica kerdo û hîna zî bica kena. Nameyê Atane zaf bêusûlîyan de derbaz beno û tewr peynî zî Atane waya xo Akîset Atane sey Mudura Qelema Taybete tayîn kerdo.
Qayûm malê şarî roşeno
Heto bîn ra qayûm Murat Zorluogluyo ke tayînê Şaredarîya Wanî bîyo, badê ke bi seyan merdimî karî ra eştî û xeylê dezgeyî padayî, nika zî dest bi rotişê mal û milkê şaredarîye kerdo. Ame musayîş ke otoparka ke wextê Şaredarîya DBPyî de seba ke problemê otoparke yê şarî bêro çareserkerdiş, amebî viraştiş hetê qayûmî ra ameyo rotiş. Reyna Sîteya Galerîvananê Wesayîtan ke erjê ci 100 mîlyonî ra zêde yo, bi 16 mîlyon û nîme ra ameyo rotiş.
Babete ser o Serekê Meclîsê Şaredarîya Bajarê Girdî ya Wanî yê DBPyî Cahît Bozbayî qisey kerd. Bozbayî va ‘qayûmî zirarêko gird dayo şaredarîye’ û wina dewam kerd: “Erjê Sîteya Galerîvananê Wesayîtî 100 mîlyon ra zêde bî, labelê bi 16 mîlyonî ra ameyo rotiş. Ti kes nêşeno bê xebera şarî malê şarî biroşo. Ganî Wezîrîya Karê Zereyî derheqê nê kesan de tehqîqat biakero. Qayûm bi rotişê mal û milkê şaredarîye hewl dano deynanê şaredarîye bido. Wina kenî ke şaredarîye bin deynî de biverdî.”
ŞIRNEX