KRHXE ser ameyê “Halê şaredarîyanê Tirkîye” kombîyayişeke viraşt. Temsîlkarê heremî û şaredarê 47 welatanê endamê Konseya Ewrûpa yê tewrê kombîyayiş bî. Hemşaredara Dêrsim Nûrhayat Altûn û Şaredarîya Peyasê ra Ayşe Serra Bûcak zî tewrê kombîyayiş bî.
Hemşaredara Dêrsim Nûrhayat Altûn ke Kongre de qisey kerd û da zonayen ke hukumata AKP netîceyanê 7ê Hezîran qebûl nêkerdo, cok ra 1ê Mijdarî de weçînayinan dibare kerd, pey coy zî qeyûm vist rojdemî. Altûn vist vîrî ke hukumat hewldayena derbeya 15ê Temuz xo rê kerd behane û bi raya halo îstîsnayî şaredarîyanê Kurdan de qeyûm bi ca kerdo.
‘Dewleta Tirk hiqûq binling kerdîya’
Altûn da zonayen ke 26 şaredarîyan de qeyûm ameyo bica kerdiş û va, ‘bi wesayîtanê zirxî dest nayê ser şaredarîyan ro. Dewleta Tirk hiqûq binling kerdîya. Ma omidarê ke Kongre na derbeya sivîl bivîno û raşt biwano.’
Altûn vist vîrî ke seba ke polîtîkayê têdûştîya cinsî avey berê, emegê cenîyan vejerê ver û seba temsîliyeta têdûşt û azad ê cenî, înan rayverîyanê heremî de sîstema hemserokînî vistiyo pratîk û her cayê ke cenî estê de no perspektîf vistê rojdema înan. Altûn herzewbîn da zonayen ke pêrokîn şaredarîyanê DBP de Navendê Weşî yê Cenî ameyê ronayen. Nê merkezan de seba çarekerdişê meseleyanê cenîyan xizmet yenê dayiş.
‘Wezîfe teslîmê walî û qeymeqaman kerdê’
Hemşaredara Dêrsim Nûrhayat Altûn aşkere kerd ke AKP kerdenanê derbekar visto dewre û nîya dewam kerd: “Wextê cûntaya lejkerî yê serranê 1980-83î de, lejkerîye û burokratan pratîk de rayverîye heremî dewr girotibî.
Derbeya lejkerî ya 1980î ra dima, yewî reynî serra 2016î de şaredar hetê hukumata navendî wezîfe ra amey girotiş û qeyûm hurendîya hinan de amey bica kerdiş. Goreyê beyananê hukumat, wezîfekerdişê qeyûman do dewam bikero. Tayî hemşaredarî zî ameyê bê wezîfedarkerdiş.” Altûn da zonayen ke wezîfeyê hemşaredaran teslîmê walîyê a sûkî ya zî qeymeqaman bîyo û va, ‘şaredarî seba ke kar bikero, ganî meqaman ra destûr bigîro. Şaredarî çarnîyayê qereqolî.’ Altûn destnîşan kerd ke şaredariyê ke qeyûm ameyê wezîfedarkerdiş, navendê cenî, çand û kulturî ameyê girotiş.
Şaredarîya Peyasê ra zî Ayşe Serra Bûcak zî hayr ant muhîmîya tewbîyayişê cenîyan yê rayverîyanê heremî ser. Bûcak aşkere kerd ke sîyaset de bîyayişê cenî bi saya camêrdan nê, netîceyê tekoşîna serbestî yê cenîyan de bîyo.
ANF / STRASBOÛRG