103 şaredarîyê ke DBPyî weçînayîşê 30ê Adara 2014î de qezenç kerdbî rê heta nika 83ê ci rê qayûmî tayîn bîyî û 89 şaredarî zî ameyî tewqîfkerdiş. Qayûman şaredarîyan de heme xebatanê DBPyî vindarnayî û dest ronayî pereyê şaredarîyan ser.
Reyna qayûman heme çîyî ra ver dezgeyanê cinîyan padayî û nê demanê peyênan de zî ame musayîş ke cinîyê ke şaredarîye de xebetîyenî, raştê tacîzî yenî. Vejîya orte ke cinîya bi nameyê E.Bya ke karê pakkerdişî kena, hetê Mustafa T.yo ke şaredarîye de şefê yewîye de xebetîyeno ra raştê tacîzî ameya.
Babete ser o E.Bye qisey kerde. E.Byî va ‘mi Mudurîya Pêroyî rê gerre kerd labelê heta nika çîyêk nêame kerdiş’ û wina dewam kerde: “No şexs sewbîna cinîyan zî tacîz keno. Bin nameyê pêvînayîşî de veng dano cinîyan û ewja de tacîz keno. Nêwazenî cinîyî bixebetyî. Wexto ke cinîyêka xebetîyena vînenî, wazenî bipelçiqnî. Nika zî wazenî ke ez gerreyê xo tepîya bigîra, seba nêyî mi tehdît kenî. Labelê ez do gerreyê xo nêgîra.”
Ez cuya xo ra etirîyena
E.Bye dewamê qiseykerdişê xo de va ‘wextê şaredarîya DBPyî de çîyê winasî nêbîyênê’ û wina domnaye: “Demanê peyênan de bi desan çîyê ke mîyanê şaredarîye de benî ver qayûm bêveng maneno. Badê ke mi ê kesî gerre kerd, ez cuya xo ra etirîyena. Eke çîyêk bêro sereyê mi, berpirsîyarê ci o kes o.”
JINNEWS/AMED