Fermandarîya YBŞyî bi wesîleya serrgêra 3. ya rizgarbîyayîşê Şengalî de wina va: “Ma serrgêra 3. ya rizgarbîyayîşê Şengalî, heme şarê xo rê pîroz kenî. Ma do nika ra pey zî seba ke xeyalanê şehîd Mam Zekî Şengalî û şehîd Mahîrî pê bîyarî, xebatanê xo bidomnî.”

Şengal 13ê teşrîna peyêne ya 2015î de netîceyê xoverdayîşêko tarîxî de çeteyan ra ame pakkerdene û azadkerdene. Fermandarîya Yewîyê Xoverdayîşê Şengalî (YBŞ) babete ser o îzehetêko nuştekî daye û serrgêra 3. ya çeteyan ra pakbîyayîşê Şengalî pîroz kerde.

Fermandarîye îzehetê xo de vato ‘ma serrgêra 3. ya rizgarbîyayîşê Şengalî, heme şarê xo rê pîroz kenî’ û wina domnayo: “Ma şexsê Şehîd Berxwedan û Bêrîvane de heme şehîdanê xo yê qehremanan bi rêzdarî û minet vîr anî. Ma do bi hêzê şehîdanê xo û xeta Rayberîye, xoserîya Şengalî mende bikerî û ma no het de sozê xo dibare kenî.”

Fermandarîye dewamê îzehetê xo de wina vato: “Roja ke sîstemê netewdewletî awan bîyo ra nata hertim hêzê nîjadperestî hewl dayî îradeya bawerî, kultur û şaranê kêmhûmaran bişiknî û no het de komplo û hêrişî ameyî viraştene. Roja ewro sey şeranê dinya, şerê dagîrkerîye benî. Hêzanê dagîrkerî hertim waşto kêmhûmaran biqedênî. Komelê ma zî cok ra bi hedef. Na çarçewa de fermano 73. de xeylê ciwan û cinîyê ma ameyî qetilkerdene. Bi seyan cinîyî seba ke nêkewî destê dagîrkeran, xo kiştî. Reyna bi hezaran cinîyî esîr kewtî destê înan. Hêzê Pawitişê Şarî şarê ma xelisna. Bi destekê înan Yewîyê Xoverdayîşê Şengalî (YBŞ) awan bi û seba ke heyfê fermanî bigîro, xo aver berd.”

Xoverdayîş 11 aşmî dewam kerd

Fermandarîye qala prosesê xoverdayîşî kerdo û wina vato: “Qet şik çin o ke abîyayîşê korîdorê merdimîye ra heta bi temamî azade bîyayena Şengalî, xeylê embazê ma yê qehremanî şehîd bîyî. Xoverdayîş 11 aşmî dewam kerd. Hemra û fedakarîyê girdî ameyî cuyayene. Cok ra ganî merdim goreyê nêyî xoverdayîşî ra biewnîyo û wina bierjno.”

Ma bi felsefya Rayber Apoyî ameyî ewro

Fermandarîye îzehet de bale anto rolê Rayberê Şarê Kurdî Abdullah Ocalanî ser û wina dewam kerdo: “Ma bi zanayîşê pawitiş û îdeolojîyê Rayber Apoyî û bawerîya xo reyde ameye roja ewroyî. Ma saya înan de serkewtişê girdî qezenç kerdî. Herçiqas ke hêzanê faşîst û dagîrkeran hewl da ke qezencanê ma çin bikerî û erjê ma parçe bikerî zî, nêresayî hedefê xo. Hêrişê 3ê adara 2017î û şehadetê Endamê Koordînasyonê Komelê Êzidî Mam Zekî Şengalîyî zî na çarçewa de bîyî. Labelê şehîdanê ma vera nê hêriş û komployan de xoverdayîşêko tarîxî nîşan da. Ma do nika ra pey zî seba ke xeyalanê şehîd Mam Zekî Şengalî û şehîd Mahîrî pê bîyarî, xebatanê xo bidomnî. Şîyayîşê ma yê Sîba û Til-Ezerî û mendişê hêzanê ma yê tîya de netîceyê xoverdayîşê ma yê 4 serran de bi.”

Sozê berzkerdişê têkoşînê xoverdayîşî

Fermandarîye peynîya îzehetê xo de serrgêra 3. ya rizgarbîyayîşê Şengalî pîroz kerde û wina qedênaya: “Ma şexsê Mam Zekîyî de heme şehîdanê bêmergan bi rêzdarî û minet vîr anî û ma soz danî ke ma do têkoşînê xoverdayîşî berz bikerî.”  

 

ROJNEWS / ŞENGAL