ŞÎLAN OZHAN / ÊLIH/ŞÛJIN
Heskîf sey merkezê şaristanîye yeno zanayîş û seba merdimîye cayêko zaf muhîm o. No cayo tarîxî nika bi viraştişê Berajê Ilisu çinîbîyayîşê reyde rî bi rî yo.
Nê rojan de seba ronayîşê bendan, qeleyê Heskîfî yew bi yew bi dînamîtan yenî teqnayîş. Xebatê sifteyînî yê berajî hetê DSÎye ra serra 1954 de dîyayî destpêkerdiş. Berajê Ilisu do hetê girdî de do bibo berajo 4. yê Tirkîya. Cok ra êdî êdî şar qeza ra yeno tehlîyekerdiş û yeno hedefkerdiş ke roşanê qurbanan ra dima bi temamî bêro vengkerdiş. Labelê wina aseno ke no zaf mumkin nîyo.
Na rewşe ra esnafê qeza zî tesîr benî. Babete ser o esnafêk qisey kerd. Esnafî wina va: “Nika tayê bo zî turîstî yenî qeza de gêrenî. Ewro ganî şar Heskîfo newe de ca bibo, labelê cayo ke şar şêro, ewja de înşaat temam nêbîyo. Wazenî ma bierşawî cayê înşaatî. Bi no hawa wazenî vernîya ameyîşê turîstan bigîrî û Heskîfî îzole bikerî. Xora turîstî sey verên nînî.”
Seba vernîgrewtişî wina kenî
Esnafî bale ant vatişanê ‘Berajê Ilisû temam bî, Heskîf turîzmî rê ame padayîş’ ser û wina va: “Wazenî bi no hawa Heskîfî rojeve ra bivejî û vernîya xoverdayîşî bigîrî. Tewr peynî dekewtiş û vejîyayîşê Qeleya Zereyî girewtî û bi no hawa bi desan turî betal bîyî. Wazenî Heskîfî bi temamî bêmerdim bikerî. Nika vanî ke ganî esnafî mîyanê 15 rojan de sûke veng bikerî. Eke seba esnafan alternatîfêk nêro awankerdiş, esnafî veng nêkenî.”