Kongreya Komelê Kurdistanijê Demokratîkî ya Ewropa (KCDK-E) aşma Hezîrane de kongreya xo ya îstîsnayî viraştbî û kongre de qeraranê muhîman girewtbîye. KCDK-Eye do çarçewaya azadîya Rayberê Şarê Kurdî Abdullah Ocalanî de 5 parzemînanê dinya de çalakî û aktîvîteyan organîze bikera. 

Kampanyaya ke hetê KCDK-Eye ra ameye destpêkerdiş do bêmaben heta serrêk dewam bikera. Kampanya do Japonya ra heta Kanada xeylê welatan de bi çalakî û aktîvîteyan bidomîya. Bi nê çalakî û aktîvîteyan do bale biancîyo tecrîdo ke Rayberê Şarê Kurd Abdullah Ocalanî ser ro yeno meşnayîş ser. Derheqê kampanya de Hemserekê KCDK-Eye Yuksel Koçî qisey kerd û malumatanê muhîman pare kerd.

Koçî vist vîrî ke ‘azadîya Ocalanî seba kurdan muhîm a’ û wina va: “Azadîya Ocalanî sere de azadîya şarê kurd û azadîya heme şaranê Rojhelato Mîyanênî ya. Cok ra ez veng dana heme hêzanê demokratîkan ke wa beşdarê kampanya bibîy.”


‘Çalakîyî seba Rayber Apoyî virazîyenî’

Koçî dewamê qiseykerdişê xo de va ‘Azadîya Rayber Apoyî seba şarê kurdî heme çî yo’ û wina domna: “Çimkî eke ewro kurdî Rojhelato Mîyanên de bîyî aktor û modelê Rojawanî zî sey nimûne yeno nîşandayîş, awankarê nînan Rayber Apo yo. Ewro tena kurdî nê xeylê şarê Rojhelato Mîyanênî sîstemê Rayber Apoyî qebul kerdî û seba ci têkoşîn danî. Cok ra azadîya Rayber Apoyî tena seba kurdan nê, seba zaf şaran muhîm a. Ma kongreya xo de qerarêko winasî girewt û ma do heme çalakî û aktîvîteyanê xo seba azadîya Rayber Apoyî bivirazî. Ma destpêkê nêyî zî bi nobeta ke ma Strasbourg de girewtbî da destpêkerdiş. Dima ra zaf welatan de çalakîyê ma dewam kerdî. Her welatê dinya de sazî û dezgehê ke girêdayeyê ma yî, kampanya de ca gênî û xebatanê xo domnenî.”


Ganî her kes tewrê çalakîyan bibî

Koçî bale ante beşdarbîyayîşê her kesî yê çalakîyan ser û wina va: “Kura de kurdêk bibo, ganî bi hawayo aktîf beşdarê nê çalakîyan bibo. Na berpirsîyarîyêka gird a. Ma Rayber Apoyî ra xebere nêgênî. Cok ra ganî ma rehet ranêkewî û cayê xo de nêvinderî. Ewro sîstemê Rayber Apoyî Amerîkaya Latîne ra heta Rojhelato Mîyanênî bîyo hêvîya xeylê şaran. Ganî rayberêko winasî ke bîyo hêvîya heme dinya, ganî azadî û wayîrvejîyayîşê ci bibo wezîfeyo yewin yê her kesî. Lazim o her kes bi na berpirsîyarî beşdarê çalakîyan bibo.”


Japonya ra heta Kanada 

Çalakîyê ke 5 parzemînan de bêrî viraştiş nê yî;

*  Do hewteyo sifteyîn yê aşma tebaxe de hetê Yewîya Bawerîyê Mezopotamya ra aktîvîteyêk bêro organîzekerdiş.

*  Hetê Ciwananê Azad ra sere de Almanya, Hollanda, Fransa, Belçîka, Îtalya, Yewnanistan, Swîsre û welatanê Îskandînavya de mabênê 9 û 12ê tebaxe de do çalakîyî bêrî viraştiş. 

*  Bi wesîleya 1ê Êlule Roja Aştîye ya Dinya de mîyanê hewteyêk de do Mîlano, Roma, Parîs, Koln, Toronto, Vîyana, Zurîh, Bruksel, Stockholm, Oslo, Marsîlya, Bern, Berlîn, Hamburg, Frankfurt, Kopenhag, Strasbourg, Hannover, Lahey, Tokyo, Cannes, Washîngton, Stuttgart, Amsterdam, Helsînkî, Kibris, Munîh, Atîna û sewbîna cayan de çalakîyî bêrî viraştiş. 

*  Do 9ê êlule de sere de Ewropa û heme welatanê dinya de mîtîng, meşîyayîş û çalakîyî bêrî viraştiş. 

*  Do 30ê êlule de Koln û Parîs de hetê Dezgehê Kulturî yê Kurdî û Tevgerê Cinîyan ra kareografîya Ocalanî bêra viraştiş.

*  Do 1ê teşrîna verêne de çalakîya Kitabxaneyo Gêraye bêro destpêkerdiş. Otobusêk do bêra amadekerdiş û na otobuse do heme bajaranê Ewropa bigêro û fikrê Ocalanî sey broşur, kitab û vilawek vila bikero.

*  Do 9ê Teşrîna verêne de bi wesîleya destpêkê Komploya Mîyanneteweyî heme bajaran de çalakî, meşîyayîş û mîtîngî bêrî organîzekerdiş. 

* Do hewteyo verên yê aşma teşrîna verêne de bajaranê muhîman de afîşê azadîya Ocalanî panoyanê reklaman de bêrî aliqnayîş. 

*  Do hewteyo peyên yê aşma teşrîna verêne de Tevgerê Kulturî yê Kurdî xeylê bajaran de aktîvîteyê kulturî organîze bikero. 

* Yeno hedefkerdiş ke aşma teşrîna peyêne de Eyaletê NRW yê Almanya de bi beşdarbîyayîşê 70 hezar kesan meşîyayîşêk bivirazîyo.

* Do 10ê Kanûne Roja Heqê Merdiman yê Dinya de çalakîya nobete bêra viraştiş û do bi hawayo girseyî beşdarê çalakî bibo.    


 ANF/BRUKSEL