2011î ra nata avûkatê ci, 2015 ra nata Heyetê Îmrali û 11ê êlule 2016 ra nata zî keyeyê Rayberê Şarê Kurd Abdullah Ocalanî nêşênî Ocalanî reyde pêvînayîş bikerî. Nizdîyê 2 serrî yo ke Girawa Îmrali ra ti xebere nîna girewtiş. Cok ra şarê kurd û dostê ci etirîyenî.
Çendêkê verî zî ser medyaya komelkî de tayê xeberî derheqê weşîya Ocalanî de ameybî parekerdiş. Parekerdişê xeberan ra dima etirîyayîşî hîna zêde bîyî û Kurdistan, Rojhelato Mîyanên û zaf cayanê dinya de şarê kurd payan ser de yo. Nizdîyê 2 aşmî yo ke çalakîyî bêmabên dewam kenî.
Bitaybetî Ewropa de çalakîyî bi hawayo sistemin domîyenî. Kurdî û dostê ci bi wesîleya 10ê Kanûne Roja Heqê Merdiman ya Dinya de seba weşî, ewleyî û azadîya Rayberê Şarê Kurd Abdullah Ocalanî meşîyayî. Nê çalakîyan ra ya ke vernîya dezgeyê CPTyî de ameybî destpêkerdiş, roja 50. de dewam kena.
Bajarê Hannover û Berlînî yê Almanya, bajarê Parîs, Marsîlya, Bordeaux û Darmstadî yê Fransa, bajarê Stockholmî yê Swêdî, Swîsre û sewbîna zaf cayan de kurdî û dostê kurdan vejîyayî raşteyan û seba Ocalan û heme hepsîyanê sîyasîyan azadîye waştî.
Kurdî çalakîyan de qerardar î
Çalakîyan de pankartê ke ser o ‘Ma cuya Ocalanî ra etirîyenî’, ‘Abdullah Ocalan rê azadî, Kurdistan rê statu’, ‘Abdullah Ocalan sertemsîlkarê kurdan o, azadîya ci azadîya ma ya’, ‘Sere Wedarne’ û sewbîna zaf pankartî ameyî akerdiş. Çalakîyan de qiseykerdişî ameyî kerdiş û vilawekî ameyî vilakerdiş.
Çalakîyan de posterê Ocalanî û beyraqê PKK, KCK, YPG û YPJyî ameyî berzkerdiş. Çalakîyan de ame waştiş ke wa CPT demêko rewêr Ocalanî reyde pêvînayîşan bikero û çalakîyî bi sloganê ‘Wa bicuyo Rayber Apo’ qedîyayî.
NAVENDÊ XEBERAN